Գաղտնի են պահում
ԱԺ արտահերթ նիստում այսօր քննարկվում է Հայաստանի Հանրապետության քրեական օրենսգրքում փոփոխություններ և լրացումներ կատարելու մասին օրենքի նախագիծն առաջին և երկրորդ ընթերցմամբ ընդունելու հարցը։ Հիմնական զեկուցող արդարադատության փոխնախարար Արթուր Հովհաննիսյանից «Ծառուկյան» խմբակցության պատգամավոր Նաիրա Զոհրաբյանը հետաքրքրվեց. «Վերջին անգամ Հայաստանում համաներում հայտարարվել է 2013թ.։ Մենք բոլորս էլ հասկանում ենք, որ մեր քրեակատարողական հիմնարկները գերծանրաբեռնված են, ավելին, բազմաթիվ կալանավորներ կան, որոնց հանդիպել եմ Արմավիր ՔԿՀ-ում, և ակնհայտ է, որ նրանց հանրային վնասակարության աստիճանն այլևս ժամանակավրեպ է: Կառավարության օրակարգում կա՞ համաներման նախաձեռնության՝ ԱԺ-ին դիմելու հարցը»,- ասաց Զոհրաբյանը։ Ի պատասխան՝ Հովհաննիսյանն ասաց, որ չի կարող այդ մասին խոսել, որովհետև համաներման հարցն ունի գաղտնիության ռեժիմ. «Մինչև վերջին րոպեն այն գաղտնի է լինելու հասարակությունից։ Բնականաբար, համաներման արդյունքում ՔԿՀ-ների բեռնաթափում կլինի, և այս առումով ուղղակի ասեմ, որ շահագրգիռ անձանցից մեկը նաև Արդարադատության նախարարությունն է»։ Զոհրաբյանի հաջորդ հարցը վերաբերվում էր ցմահ ազատազրկվածներին: Ինչպես շեշտեց՝ ցմահ ազատազրկման և առավել ծանր հանցագործությունների դեպքում կալանավորը զրկված է իր հարազատի՝ ծնող, կին, երեխա, հուղարկավորությանը մասնակցելուց, և դա, ըստ նրա ծայրահեղ խստացված է, և այստեղ նույնպես վերանայման կարիք կա: Արթուր Հովհաննիսյանը պատասխանեց, որ ցմահ ազատազրկվածների պահման պայմանների հետ կապված հարցերը փոփոխման ենթակա են. «Արդարադատության նախարարությունն այս առումով շարունակաբար միջոցառումներ է ձեռնարկում։ Վերջին նախաձեռնությունը, որ ներկայացրեց կառավարությունը, ցմահ ազատազրկվածների տեսակցությունների թվի կրկնապատկումն էր։ Մեր ենթակառուցվածքների զարգացման հետ մեկտեղ՝ մենք ընդլայնում ենք նաև ցմահ ազատազրկված անձանց իրավունքները»:
Հետևեք մեզ Viber-ում
