Ինչ որոշվեց. երկրորդ երեխայի ծննդյան միանվագ նպաստը որքան կկազմի

Գործող օրենքի համաձայն, առաջին և երկրորդ երեխաների ծննդյան միանվագ նպաստի չափը կազմում է հիսուն հազար դրամ, երրորդ կամ չորրորդ երեխայի ծնվելու դեպքում` մեկ միլիոն դրամ, հինգերորդ և յուրաքանչյուր հաջորդ երեխայի ծնվելու դեպքում` մեկ միլիոն հինգ հարյուր հազար դրամ: Գործող իրավակարգավորումներով երեխայի ծննդյան միանվագ նպաստի չափի տարբերակումը սկսվում է երրորդ երեխայից սկսած: Կառավարության նիստում Աշխատանքի և սոցիալական հարցերի նախարարն առաջարկեց, որ 2018թ. հոկտեմբերի մեկից յուրաքանչյուր երկրորդ երեխայի ծննդյան միանվագ գումարը հիսուն հազար դրամի փոխարեն սահմանվի հարյուր հիսուն հազար դրամ։ «Երկրորդ երեխայի ծնունդը ռազմավարական նշանակություն ունիմեր պետության համար: Միտումը ցույց է տալիս, որ անհանգստանալու տեղիք կա»,-ասաց նախարարը: Ըստ նախագծի` որոշումն ուժի մեջ է մտնում 2018 թվականի հոկտեմբերի 1 ին (տարածվում է այն դեպքերի վրա, երբ երեխան ծնվել է 2018 թվականի հոկտեմբերի 1-ին կամ դրանից հետո): Երկրորդ երեխայի` մինչեւ 2018 թվականի հոկտեմբերի 1-ը ծնված լինելու դեպքում երեխայի ծննդյան միանվագ նպաստը, Հայաստանի Հանրապետության կառավարության սահմանված կարգով, նշանակվում եւ վճարվում է հիսուն հազար դրամի չափով: Հաշվի առնելով նիստում հնչած կարծիքներն ու հարցի կարևորությունը, վարչապետն առաջարկեց նախագծի ընդունումը հետաձգել մեկ շաբաթով: