Ռոբերտ Քոչարյանը երեկոյան «կամինի» մոտ նստած չի գրել հրամանները. փաստաբան
Երկրորդ նախագահ Ռոբերտ Քոչարյանի պաշտպան Արամ Օրբելյանը այսօր հայտարարեց, որ իրենք բազմիցս ասել են` իր լիազորություններից ելնելով կատարած գործողությունների համար նախագահը չի կարող պատասխանատվության ենթարկվել: Ըստ Օրբելյանի` ՀՀ նախագահը 2008թ. մարտի 1-2 դեպքերի և դրանց պատասխան գործողությունների համար երեկոյան չի նստել «կամինի» մոտ ու հրամաններ գրել: Այդ հրամանները մշակվել են նախագահի աշխատակազմում, դրանց վրա աշխատել են մասնագետները, հաշվի են առնվել համապատասխանությունը օրենքներին, ապա նոր միայն ստորագրվել նախագահի կողմից: ՀՀ երկրորդ նախագահ Ռոբերտ Քոչարյանի պաշտպան Հովհաննես Խուդոյանն էլ ասաց, որ իրենք դիմել են ՀՔԾ-ին, որպեսզի թույլ տան հատվածաբար հրապարակել այն տվյալները, որոնք տրամաբանորեն չեն կարող խոչընդոտել նախաքննությանը, սակայն մերժում են ստացել: Դրան զուգահեռ՝ ՀՔԾ-ն շարունակել է հատվածաբար ինֆորմացիա տրամադրել: Հարցին, թե արդյոք Քոչարյանն է իրավապահ մարմիններին հրաման տվել լուսադեմին գործողություններ իրականացնել՝ փաստաբանը պատասխանեց, որ ոչ:
Հետևեք մեզ Viber-ում
