Եթե մեկը կասի, որ ես ասել եմ ընտրակաշառք բաժանեք,պատրաստ եմ անձամբ պատասխանատվություն կրել.Գագիկ Ծառուկյան (video)

Եթե երեւանցին վստահելով, հավատալով ձայնը տվեց մեր ուժին, ուրեմն իմացեք, որ հաջորդ օրվանից մեր ծրագրերի աշխատանքները սկսվելու են: Այս մասին, այսօր՝ սեպտեմբերի 4-ին, «Մոսկվա» կինոթատրոնում Երեւանի ավագանու ընտրություններում ԲՀԿ ցուցակի անդամների հետ հանդիպման ժամանակ նշեց ԲՀԿ առաջնորդ, ԱԺ պատգամավոր Գագիկ Ծառուկյանը: «Ամենակարեւորը, առաջնայինը լիֆտերի խնդիրն է, տրանսպորտի խնդիրն է, բնակելի շենքերի կառուցման խնդիրն է: 25-30 տարի Երեւանը երեւանցիների համար չի կառուցում, կառուցվում է որպես բիզնես: Այսօր Հայաստանի բնակչության 40 տոկոսը պետականորեն ճանաչված է աղքատ, 40-45-ը՝ միջին: Այսինքն ստացվում է, որ միայն փողատերերը պետք է բնակարան առնե՞ն: Բայց բոլորն էլ մեր ժողովուրդն են, պետք է բնակարանի հարց կարգավորվի, որ շահույթը կրկնակի եռակի չլինի, լինի, ասենք 10-20 տոկոս: Այդ դեպքում, մեր հաշվարկներով քմ-ն կլինի մոտավորապես 270 դոլար: Թող 50 դոլար էլ Երեւանը շահույթ ունեն, թող դառնա 330 դոլար, 10 տոկոս էլ բանկին, թող լինի 340 դոլար: Այդ դեպքում բնակարան կարելի է գնել 17 հազար դոլարով»,-հայտարարեց ԲՀԿ առաջնորդը՝ հավելելով, որ ում էլ իր ձայնը տա երեւանցին, իրենք չեն նեղանալու, իրենք եկել են պատասխանատվություն վերցնելու: Ծառուկյանը կոչ արեց ԲՀԿ թեկնածուներին բոլոր մյուս թեկնածուների հետ լինել շատ հարգալից. «Միայն թույլ մարդը կարող է մրցակից թեկնածուին վիրավորել»: