Ի՞նչ հայտարարի եկան Արմավիրի մարզպետն ու խաղողագործները

Արմավիրի մարզպետ Գագիկ Միրիջանյանն այսօր հանդիպել է խաղողի մթերման ցածր գներից դժգոհ խաղողագործների հետ։ Հանդիպմանը խաղողի մթերման ցածր գների դեմ բողոքող արմավիրցի խաղողագործներից մեկը խնդրի լուծման 3 տարբերակ է առաջարկել։ «Առաջին տարբերակը՝ թող ոնց գործարանները սեփականաշնորհել են, այնպես էլ հետ առնեն ձեռքներից, սա ուտոպիստական լուծում է։ Երկրորդ՝ թող պետությունը իր միջոցներով ալտերնատիվ մրցակցային գործարաններ սարքի, հիմա մրցակցություն չկա. սա նույնպես ուտոպիստական է։ Երրորդը՝ Վրաստանի նման. պետությունը սուբսիդավորում է խաղողի գինը, եթե գործարարը տալիս է 140 դրամ, պետությունը սուբսիդավորի մնացած 20 դրամը։ Մոտավոր հաշվարկով, եթե 100 հազար տոննայի մթերում ունենք, 20 դրամը եթե սուբսիդավորի, անում է 2 միլիարդ դրամ: Որ ասում են՝ 200 հազար տոննա խաղող կա, սուտ են ասում։ Հայաստանում խաղողի տեխնիկական սորտի բերքատվությունը 80–100 հազար տոննա է՝ լավագույն տարիներին։ Դրանք դրսից ներկրվածների հաշվին ուռճացված թվեր են։ Հետո հանկարծ որտեղից որտեղ հայտնվեց Հրաչ Բերբերյանը, սամազվանեցի մեկը, ասաց, որ խաղողի բերքը աննախադեպ է։ Կոնկրետ մեր գյուղում, որն ավանդական խաղողագործության գյուղ է, բերքի 70 տոկոսը չկա՝ հիվանդությունների եւ կարկտահարության պատճառով», -պարզաբանեց արմավիրցի խաղողագործը։ Ինչպես հայտնի է, Երևանի կոնյակի գործարանը խաղողի մթերման սակագինն այս տարի սահմանել է 1 կիլոգրամի համար 140 դրամ, իսկ Պռոշյանի Կոնյակի գործարանի Արմավիրի մասնաճյուղը՝ մինչև սեպտեմբերի 3-ը, 1 կիլոգրամ խաղողը մթերել է 160 դրամով: Սակայն սեպտեմբերի 4-ին գործարանը հրաժարվել է սահմանված սակագնից՝ հայտարարելով, որ խաղողը մթերելու է 140 դրամով: Հանդիպման ժամանակ մարզպետը լսել է խաղողագործների դժգոհություններն ու առաջարկությունները` վստահեցնելով, որ նրանց մենակ չի թողնելու ստեղծված իրավիճակում. «Ես` որպես Արմավիրի մարզպետ, հայտարարում եմ, որ այն գյուղացին, որն ունի պայմանագիր տնտեսվարող սուբյեկտի հետ, որտեղ կա հստակ ֆիքսված գին, մենք մինչև վերջ գնալու ենք, որ գյուղացին մթերի այդ գնով։ Մնացածն աշխատանքային պրոցես է, և մենք փորձելու ենք լուծումներ գտնել»: