Նոր հարված թիկունքից. Մոսկվայի և Բաքվի հերթական պլանները

Ռուսաստանը կշարունակի աջակցություն ցուցաբերել Լեռնային Ղարաբաղի հակամարտության խաղաղ լուծմանը, հայտարարել է Ռուսաստանի նախագահ Վլադիմիր Պուտինը Սոչիում Ադրբեջանի իր գործընկեր Իլհամ Ալիևի հետ հանդիպմանը: «Իհարկե, մենք կարծիքներ փոխանակեցինք միջազգային և տարածաշրջանային խնդիրների շուրջ, մասնավորապես, բնականաբար, խոսեցինք Լեռնային Ղարաբաղի հիմնահարցի մասին: Որպես Մինսկի խմբի համանախագահ՝ Ռուսաստանը կշարունակի հնարավոր բոլոր ջանքերը այդ հակամարտության խաղաղ լուծմանն աջակցելու ուղղությամբ»,- ասել է Պուտինը: Պուտինը նաև նշել է, որ Ռուսաստանի և Ադրբեջանի հարաբերությունները կրում են գործընկերային, փոխշահավետ բնույթ, իսկ նոր բանակցությունները լրացուցիչ խթան կհաղորդեն դրանց: «Ռուսաստանն ու Ադրբեջանը միմյանց կապված են բարեկամության և համագործակցության ամուր կապերով: Մեր պետությունների հարաբերությունները կրում են գործընկերային, փոխշահավետ բնույթ՝ հիմնված բարիդրացիության, միմյանց շահերը հարգելու սկզբունքների վրա»,- ասել է Պուտինը: Նա հույս է հայտնել, որ այս բանակցությունները լրացուցիչ խթան կհաղորդեն ռուս-ադրբեջանական կապերի հետագա զարգացմանը. «Հենց դրան է ուղղված Ադրբեջանի նախագահի հետ ստորագրած համատեղ հայտարարությունը, ինչպես նաև միջկառավարական և միջգերատեսչական համաձայնագրերի փաթեթը»,- ասել է նա: Բնականաբար երկկողմ հարաբերությունների մակարդակից գոհունակություն է հայտնել նաև Ադրբեջանի նախագահ Իլհամ Ալիևը՝ նշելով, որ նման հանդիպումները դինամիկա են հաղորդում այդ կապերին: «Հարաբերութունները զարգանում են լիարժեք, շատ արդյունավետ, ակտիվ քաղաքական երկխոսություն է: Մենք գրանցել ենք ապրանքաշրջանառության աճ, ինչը խոսում է մեր երկրների տնտեսություններում դրական միտումների մասին: Նաև վկայում է այն մասին, որ կա տնտեսական համագործակցության մեծ ներուժ: Վստահ եմ, որ ապրանքաշրջանառությունը կավելանա և հաջորդող տարիներին»,- ասել է Ալիևը: Այսպես Պուտինն՝ Ալիևի հետ հանդիպմանը վստահեցնում է, որ Ռուսաստանը կաջակցի ղարաբաղյան հակամարտության խաղաղ կարգավորմանը: Իսկ Ալիևը, այսպես ասած, «գլուխ է գովում»՝ հիշեցնելով, թե՝ «Ադրբեջանը Ռուսաստանից ավելի քան 5 միլիարդ դոլարի ռազմական տեխնիկա է գնել»: Ադրբեջանի նախագահ Իլհամ Ալիևը իր ռուս գործընկեր Վլադիմիր Պուտինի հետ բանակցություններից հետո: Իլհամ Ալիևը տեղեկացրել է. «Մենք քննարկել ենք հետագա համագործակցությունը ռազմատեխնիկական ոլորտում, որն արդեն ունի մեծ ավանդույթներ: Ռուսաստանից Ադրբեջանի կողմից ձեռք բերված ռազմատեխնիկական արտադրանքը գերազանցում է 5 միլիարդ դոլարը և այդ ծավալները միտում ունեն աճելու»: Ապա` Ալիևը հավելել է, որ Ադրբեջանը շարունակում է Զինված ուժերի արդիականացումը, իսկ Ռուսաստանը համարվում է միջազգային շուկաներում ռազմարդյունաբերական արտադրանքի ամենակարևոր արտադրողը: Դե ինչ, ռուս-ադրբեջանական տնտեսական, էներգետիկ, ռազմական ոլորտների հարաբերություններում նոր ջերմացման հերթական փուլի մեկնարկ է տրվում: Սոչիում ստորագրվել են տնտեսական համագորածակցության խորացմանն ուղղված մի շարք համաձայնագրեր։ Սոչիում առանցքային էր ռուս-ադրբեջանական համագործակցությունը նաև էներգետիկայի ոլորտում: Բաքուն ձգտում է նրան, որպեսզի Մոսկվան ակտիվորեն ներդրումներ կատարի Ադրբեջանի տարանցիկ ծրագրերում: Հիշեցնենք, որ Ռուսաստանն Ադրբեջանի հիմնական առևտրային գործընկերներից է․ առաջին հնգյակում զիջում է միայն Իտալիային և Թուրքիային։ Միայն այս տարվա հունվար-հուլիս ամիսներին երկու երկրների միջև ապրանքաշրջանառությունը կազմել է 1 միլիարդ 3 միլիոն դոլար։ Ռուսական ներդրումներն Ադրբեջանի տնտեսությունում կազմում են շուրջ 4 միլիարդ դոլար։ Ալիևի այցը նպատակ ունի ընդլայնել տնտեսական համագործակցությունը։ Իհարկե, Սոչիի օրակարգում էր արցախյան խնդիրը, այստեղ դարձյալ Ալիևի հույսը՝ Պուտինը, իսկ Պուտինն էլ կարծես այս անգամ ավելի ընդարձակվեց՝ նշելով, որ պատրաստ է աջակցել գործընթացին: Մնում է հասկանալ՝ ե՞րբ և ինչպե՞ս, և որ ավելի կարևոր է՝ ինչի՞ հաշվին... Մետաքսյա Շալունց