140 միլիոն դրամ գումար կվերադարձվի պետբյուջե. Դավիթ Սանասարյան

Սեպտեմբերի 5-ին րագրողների հետ հանդիպմանը Հայաստանի Հանրապետության պետական վերահսկողության ծառայության պետ Դավիթ Սանասարյանը՝ ամփոփելով պաշտոնավարման 100 օրը, հայտարարեց, որ Հայաստանի Հանրապետության պետական վերահսկողության ծառայությունը զորահավաքի կազմակերպման հետ առաջարկներ է ներկայացրել պաշտպանության նախարարությանը, որոնք կյանքի կոչելու արդյունքում կոռուպցիոն ռիսկերն ավելի կնվազեն: «Իմ խորհրդականները եղել են կենտրոնական զինվորական հավաքակայանում, մշտադիտարկում են իրականացրել, որի արդյունքում ծնվել են առաջարկներ, որոնք մենք ներկայացրել ենք պաշտպանության նախարարությանը: Մենք կարծում ենք, որ զորահավաքը մի փոքր այլ կերպ է պետք կազմակերպել, որի արդյունքում կոռուպցիոն ռիսկերն ավելի կնվազեն»,- մանրամասնեց նա: Այնուհետև տեղեկացրեց, որ կան օբյեկտիվ դժգոհություններ, թե ինչ է անում Պետական վերահսկողական ծառայությունն այս ընթացքում և պարզաբանեց. «Ուզում եմ իմանաք, որ զրոյից կառույց հիմնելը շատ դժվար, բայց շատ հաճելի գործ է»։ Նա ասաց, որ առաջինը վերահսկողություն են իրականացրել Հայաստանի բարձրավոլտ էլեկտրացանցերում, «Լուսանշան» ՊՈԱԿ-ում։ Բոլոր կառույցներում, ըստ նախնական գնահատականի, հանցակազմ պարունակող իրավիճակներ են եղել։ «Առաջիկայում Հայաստանի բարձրավոլտ էլեկտրացանցերից 140 միլիոն դրամ գումար կվերադարձնեն պետբյուջե։ «Հայրենիք-Սփյուռք» ՊՈԱԿ-ի տնօրենը պատրաստակամություն է հայտնել 100 միլիոն դրամ գումար վերադարձնել պետբյուջե», - ասաց Դավիթ Սանասարյանը: