«Փաշինյանը նստել է այն մեքենան, որը քշել չգիտի». Աշոտյան

Հայաստանի քաղաքացիները գործող կառավարությունից կոնկրետ արդյունքներ են սպասում։ Այս մասին այսօր՝ սեպտեմբերի 4-ին լրագրողների հետ զրույցում հայտարարեց ՀՀ ԱԺ արտաքին կապերի հանձնաժողովի նախագահ, ՀՀԿ խմբակցության պատգամավոր Արմեն Աշոտյանը։«Կարծում եմ՝ անցած 100 օրը բավականաչափ ժամանակ էր կառավարության համար, որպեսզի ինքնին իր գոյության փաստը, համեմատելով նախկին իշխանությունների գոյության հետ, իր համար մաքսիմալ PR դիվիդենտներ շահելու համար օգտագործի։ Հայաստանի քաղաքացիները գործող կառավարությունից սպասում են կոնկրետ արդյունքներ եւ չեն կարող բավարարվել թեւավոր խոսքերով, ինչպես, ասենք, «բա Սերժի ժամանակ ինչի՞ չէիք խոսում»-ի, «Բա Սերժի ժամանակ լա՞վ էր»-ի տեսքով: Այո՛, շատ դեպքերում նաեւ լավ էր, շատ դեպքերում նաեւ խոսում էին տարբեր մարդիկ, որոնք այսօր էլ քննադատում են գործող կառավարությանը»,- նշեց նա։ Արմեն Աշոտյանը քարոզչական ու մանիպուլյացիոն հնարք է համարում այն հարցադրումները, թե նախկինում ՀՀ-ում չէին խնդիրները կարգավորվում, այլ դրսում, քանի որ ՀՀ իշխանությունները լեգիտիմություն չունեին․ «Այս քարոզչական հնարքն օգտագործվում է բազմաթիվ արևմտամետ ասոցիացիաներ ունեցող ԶԼՄ-ների կողմից։ Եթե կարծում եք, որ քարոզչական ու մանիպուլյացիոն նպատակներ հետապնդող նյութերով արտաքին քաղաքականություն կառուցելը ճիշտ է, ապա սխալվում եք»,- շարունակեց Աշոտյանը։ Ըստ պատգամավորի՝ լեգիտիմացման կապիտալիզացիան որպես փաստ ներկայացնելը Բրյուսելում չի ստացվել. «Ես որքանով գիտեմ մամուլից եւ ոչ միայն մամուլից, այս լեգիտիմացման կապիտալիզացիան որպես փաստ ներկայացնելը Բրյուսելում չի ստացվել, որովհետեւ Բրյուսելում բարձրաստիճան պաշտոնյաները մեր վարչապետին ասել են, որ Բրյուսել եկած ՀՀ բոլոր պաշտոնյաներին դիտարկել են որպես լեգիտիմ։ Ոչ լեգիտիմ ղեկավարների հետ համաձայնագիր չէին կնքի։ Հայաստանի կառավարությունը չունի ֆանտաստիկ լեգիտիմություն, ինչպիսին վարչապետ Նիկոլ Փաշինյանինն է»,- հավելեց նա: Հարցին, որ սուպերվարչապետական համակարգը ՀՀԿ-ն էր հաստատել, ավելին՝ ժամանակին հերքում էր, թե նման բան կա, իսկ հիմա պարզապես վարչապետ Փաշինյանն օգտվում է Սահմանադրությամբ իրեն տրված հնարավորություններից, Արմեն Աշոտյանը պատասխանեց․ «Փաշինյանը նստել է այն մեքենան, որը քշել չգիտի»։