Թե ինչու են աշխատավարձերը ցածր կառավարման համակարգում

«Երեք օր առաջ իմ հեռախոսին ես մի այսպիսի հաղորդագրություն եմ ստացել, քաղաքացին ինձ գրել էր՝ պարոն վարչապետ, աշխատում եմ փրկարար ծառայությունում, ապրելու հնար չկա: Ես գիտեմ, որ այս հաղորդագրությունը կարող էին ուղարկել շատ շատերը՝ ԱԻՆ-ից, Զինված ուժերից, ոստիկանությունից, ԱԱԾ-ից և այլ մարմիններից: Մենք գիտենք, որ սա խնդիր է, որը մենք միասին պետք է լուծենք»,-  ԱԻՆ աշխատակցի օրվա նվիրված միջոցառման ժամանակ այսօր ասաց վարչապետ Նիկոլ Փաշինյանը: Ըստ Փաշինյանի՝ այսօր պետական կառավարման համակարգում աշխատավարձերը ցածր են շատ դեպքերում նաև այն պատճառով, որ այդ կառավարման համակարգերն արդյունավետ չեն կառավարվում, պետական միջոցներն արդյունավետ չեն տնօրինվում: «Մենք ոչ թե սկզբից պետք է լավ ապրենք և հետո միայն մտածենք մեր պետության, պետական միջոցների, երկրի արդյունավետ կառավարման մասին, այլ հակառակը պետք է տեղի ունենա»,- ընդգծեց նա: