Րաֆֆի Հովհաննիսյանը Երեւանի քաղաքապետի բոլոր թեկնածուներին հանդիպման է կանչում
«Ժառանգություն» կուսակցության հիմնադիր, կուսակցությունից Երեւանի քաղաքապետի թեկնածու Րաֆֆի Հովհաննիսյանը հանդիպման է հրավիրում Հայաստանի մայրաքաղաքի քաղաքապետի բոլոր թեկնածուներին: «Ժառանգության» հիմնադիրը Երեւանի ավագանու ընտրություններին մասնակցող բոլոր ուժերի ցուցակները գլխավորող անձանց կոչ է անում այս չորեքշաբթի օրը՝ սեպտեմբերի 5-ին, հանդիպել Ռազմավարական եւ ազգային հետազոտական կենտրոնի նիստերի դահլիճում եւ հրապարակավ՝ մամուլի ներկայությամբ, քննարկել ու ընդհանուր հայտարարի գալ առաջիկա ընտրությունները հավասարության, քաղաքավարության եւ փոխադարձ հարգանքի արժանապատիվ մթնոլորտում անցկացնելու սկզբունքների շուրջ: «Բոլորս լիահույս ենք, որ Երեւանի ավագանու առաջիկա ընտրությունները պետք է դառնան ամենաազատը, ամենաարդարն ու ամենաթափանցիկը Հայաստանի Հանրապետության վերջին գրեթե քառորդդարյա պատմության մեջ: Դրան զուգահեռ շատ կարեւոր է, որպեսզի ընտրություններն անցնեն դրական միջավայրում՝ սիրո եւ համերաշխության հեղափոխության ոգուն ու Նոր Հայաստանի մասին ՀՀ քաղաքացիների՝ հատկապես երեւանցիների պատկերացումներին հարիր»,- ասված է Հովհաննիսյանը հայտարարությունում:
Հետևեք մեզ Viber-ում
