Սերժ Սարգսյանի խնամի Ալիսա Ղազարյանն ազատվել է դպրոցի տնօրենի պաշտոնից. ՀԺ

Երեւանի Վարդգես Պետրոսյանի անվան հ.51 հիմնական դպրոցի տնօրեն Ալիսա Ղազարյանը, որն ի դեպ, Սերժ Սարգսյանի խնամին է (Սաթենիկ Սարգսյանի ամուսնու մայրը), ազատվել է զբաղեցրած պաշտոնից: Դպրոցի փոխտնօրեն, այժմ նաեւ տնօրենի ժամանակավոր պաշտոնակատար Անուշ Ալավերդյանը, հաստատելով մեր տեղեկությունը, նշեց, որ Ղազարյանն աշխատանքից ազատվել է իր դիմումի համաձայն. լրացել է նրա պաշտոնավարման հնգամյա ժամկետը: Այժմ հայտարարվել է հ.51 դպրոցի տնօրենի թափուր պաշտոնի մրցույթ: Այն կայանալու է սույն թվականի հոկտեմբերի 1-ին: Դիմումների ընդունման վերջնաժամկետը սեպտեմբերի 19-նն է: Տնօրենի պաշտոնակատարի փոխանցմամբ, առայժմ որեւէ հավակնորդ մրցույթին մասնակցելու դիմում չի ներկայացրել: Ենթադրվում է, որ նախկին տնօրեն Ալիսա Ղազարյանն այս անգամ չի առաջադրի իր թեկնածությունը: Անուշ Ալավերդյանը նշեց, որ հ. 51 դպրոցից երկու ուսուցիչ, այդ թվում՝ ինքը, ցանկություն ունեն մասնակցել թափուր պաշտոնի մրցույթին: Բայց դրա համար, ինչպես հայտնի է, անհրաժեշտ է ունենալ համապատասխան հավաստագիր: Նշված երկու մանկավարժները մասնակցում են դա ձեռք բերելու համար անհրաժեշտ դասընթացին: Անուշ Ալավերդյանը, սակայն մտավախություն ունի, որ չեն հասցնի քննություն հանձնել եւ շեմը հաղթահարելու դեպքում հավաստագիր ստանալ մինչեւ տնօրենի պաշտոնի հավակնորդների դիմումների ընդունման վերջնաժամկետը: Նա նշեց, որ դա կապված է քննությունը էլեկտրոնային դարձնելու պատճառով սպասվող ձգձգումների հետ ու խնդրանքով դիմեց կրթության ոլորտի պատասխանատուներին՝ անհրաժեշտության դեպքում երկարաձգել դիմումների ընդունման վերջնաժամկետը, որպեսզի իրենք նույնպես դրան մասնակցելու հնարավորություն ունենան: