Ուզում եմ ներդրում անել Հայաստանում և վերադառնալ հայրենիք․ Վան Լապոյան

Ուկրաինայի հայերի միության գրասենյակ է այցելել «VHL Developments» շինարարական ընկերության հիմնադիր, կանադահայ հայտնի գործարար Վան Լապոյանը։ Վերջինս Ուկրաինայում է 3-օրյա այցով, ինչից հետո մեկնելու է Հայաստան։ Առիթը բաց չթողնելով՝ զրուցեցինք պրն․ Լապոյանի հետ Ուկրաինա նրա այցի ու հայկական համայնքների մասին։ Պրն ․ Լապոյան, ողջունում ենք Ձեզ Ուկրաինայում։ Ի՞նչը Ձեզ այստեղ բերեց։ Եթե իմանայի, որ այստեղ այսքան մեծ է հայ համայնքը, վաղուց այցելած կլինեի (ժպտում է)։  Տորոնտոյից մեկնում էի Հայաստան և որպես միջանցիկ երկիր, պետք է կանգ առնեի Ուկրաինայում։ Ընկերս՝ Կանադայում ՀՀ դեսպան Լևոն Մարտիրոսյանը, խորհուրդ տվեց Ուկրաինայում ծանոթանալ հայ համայնքի հետ։ Ես իսկապես ապշած եմ, չգիտեի, որ Ուկրաինայում կես միլիոն հայ է ապրում։  Ի՞նչ հասցրեցիք տեսնել այս երկու օրերի ընթացքում։ Հասցրել եմ զբոսնել կենտրոնական փողոցներով, ծանոթանալ ազգային խոհանոցին, տեսնել հայկական նորակառույց եկեղեցին։ Ի դեպ, շքեղ էր, չգիտեի, որ Անիի տուֆ է բերվել հատուկ եկեղեցու կառուցման համար։ Մասշտաբներն էլ տպավորիչ էին, ուրախ եմ, որ հայկական համայնքը կունենա այդպիսի հոգևոր տուն։ Եվ ամենակարևորը՝ ծանոթացա Ձեզ՝ հայկական համայնքի հետ։ Իսկ ինչպիսի՞ն է կանադահայ համայնքը, եթե զուգահեռներ անցկացնենք ՈՒՀՄ-ի հետ։ Կանադայում հայկական համայնքը հիմնականում կենտրոնացած է Տորոնտոյում և Մոնրեալում։ Տորոնտոյում ապրում է շուրջ 60․000 հայ։ Ունենք եկեղեցի, մշակույթի կենտրոն, դպրոց։ Ի դեպ, դպրոցն ամենօրյա հանրակրթական դպրոց է, որտեղ սովորում է 700 աշակերտ։ Համայնքում գոյություն ունեն տարբեր մշակութային, քաղաքական, հասարակական կազմակերպություններ։ Բայց ի տարբերություն Ուկրաինայի, Կանադայում հայ համայնքը միավորված չէ մեկ կազմակերպության մեջ։ ՈւՀՄ-ի օրինակով ես հասկանում եմ, որ եթե ամբողջ համայնքը կենտրոնացված լինի մեկ կազմակերպության մեջ, գործունեությունն ավելի արդյունավետ կլինի։ Պարբերաբար հանդիպումները, համատեղ կոնֆերանսները, քննարկումները, դրանք բոլորը անհրաժեշտություն են համայնքը կուռ պահելու գործում։ Այդ մասին ես խոսեցի նաև ՈւՀՄ նախագահ Վիլեն Շատվորյանի հետ, ինձ հետաքրքիր էր նրա կարծիքը, փորձը, թե ինչպես է կարողացել համախմբել Ուկրաինայում ապրող բոլոր հայերին։ Շատ հարցերում մենք միանման ենք մտածում, ինձ դա դուր է գալիս։ Շատ օգտակար հանդիպում էր, հուսով եմ առիթ կունենամ նրան հյուրընկալելու Տորոնտոյում և ծանոթացնելու կանադահայ համայնքի հետ։ Եվ վերջում, նշեցիք, որ մեկնում եք Հայաստան։ Նպատակայի՞ն այց է և արդյո՞ք կա ցանկություն ընդմիշտ վերադառնալու Հայաստան։ Այո, ես ուզում եմ ներդրում անել Հայաստանում։ Հայաստանում կատարվող փոփոխությունները պարարտ հող են ստեղծում նոր ներդրումների համար, ես էլ անմասն չեմ մնա։ Առհասարակ, մտածում եմ Հայաստան վերադառնալու և Հայաստանում ապրելու մասին։ Դա և ցանկություն է, և նպատակ։ Միտք ունեմ Հայաստանում համախմբել սփյուռքահայ գործարարների և մի հարթակ ստեղծել, որտեղ նոր մտքեր կգեներացվեն՝ միտված Հայաստանի զարգացմանը։ sau.org.ua