«Արթուր Սարգսյանի գործով կունենանք հստակ պատկեր». ՀՔԾ պետ (video)

«Հաց բերող» Արթուր Սարգսյանի մահվան գործը նախկինում լիարժեք չի քննվել, այսօր ասաց ՀՔԾ պետ Սասուն Խաչատրյանը՝ նշելով, որ փորձաքննության արդյունքները դեռևս չեն ստացվել, ակնկալվում է դրանք ստանալ սեպտեմբերի կեսերին: Ըստ Խաչատրյանի՝ նշանակվել է հանձնաժողովային դատաբժշկական փորձաքննություն, ներգրավվել են լավագույն մասնագետները: «Հուսով եմ, որ մենք սեպտեմբերի կեսերին կունենանք հստակ պատկեր: Գործը կքննվի շատ հրապարակային, փորձագետի երզակացությունն ստանալուց հետո նաև որոշակի քննչական գործողություններ կատարելու անհրաժեշտություն կլինի: »,- հավելեց Սասուն Խաչատրյանը: Հիշեցնենք, որ 2016թ. Արթուր Սարգսյանն` ավտոմեքենայով ճեղքելով ոստիկանական պատնեշը, մտել էր ՊՊԾ գունդ և սնունդ հասցրել «Սասնա ծռերի» անդամներին: Հուլիսի 31-ին իրավապահներին հանձնվելուց հետո, Արթուր Սարգսյանը կալանավորվեց և նրան մեղադրանք առաջադրվեց ՀՀ քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք զինամթերք ձեռք բերելը, իրացնելը, պահելը, փոխադրելը)։ Կարճ ժամանակ անց, վերաորակավորվեց Արթուր Սարգսյանի մեղադրանքը, և նա մեղադրվեց զինված խմբի անդամներին օժանդակելու մեջ։ 2016 թվականի դեկտեմբերի 30-ին Արթուր Սարգսյանը ազատվեց կալանքից: 2017 թվականի փետրվարի 9-ին կրկին ձերբակալվեց` փետրվարի 3-ին քննչական մարմին չներկայանալու մեղադրանքով: Երկրորդ ձերբակալության առաջին օրվանից Արթուր Սարգսյանն անժամկետ հացադուլ հայտարարեց, ինչի հետևանքով նրա առողջական վիճակը կտրուկ վատացավ և, նրա փաստաբանների կարծիքով, պատճառ դարձավ մահվան։