Նոր գործ Հովիկ Աբրահամյանի դեմ
«Առաջին լրատվական»-ը գրում է. Նախկին վարչապետ Հովիկ Աբրահամյանի շուրջ օղակը կարծես թե սեղմվում է ավելի ու ավելի: Զենք-զինամթերքի և Մարտի 1-ի գործին զուգահեռ՝ Աբրահամյանները ներգրավվում են կարծես թե նաև բիզնես խլելու գործով: Համենայնդեպս, այդ մասին տեղեկատվություն է տարածել Քննչական կոմիտեն՝ գործը փոխանցելով ՀՔԾ: Իհարկե, քանի դեռ չկա դատարանի վճիռ, որևէ մեկն անմեղ է, սակայն տվյալ պարագայում առավել ուշագրավն իհարկե գործընթացն է, որ ծավալվում է Աբրահամյանների շուրջ: Ընդ որում, հատկանշական է, որ այդ գործընթացի շուրջ էլ բավականին հանդարտ է, այսպես ասած, քաղաքական իրավիճակը, մասնավորապես՝ նախկին համակարգը կամ իշխանությունը, որը չի շտապում իր պաշտպանության տակ առնել Աբրահամյանին՝ ի տարբերություն, օրինակ, Ռոբերտ Քոչարյանի: Հովիկ Աբրահամյանը 2016 թվականին գժտվեց այդ համակարգի կամ իշխող կուսակցության հետ, եղավ հռետորական փոխհրաձգություն անգամ Սերժ Սարգսյան-Հովիկ Աբրահամյան մակարդակում: Հովիկ Աբրահամյանը որոշակի ժամանակ, ջանք թափեց ՀՀԿ-ականներին հավաստիացնելու, որ իրեն Կարեն Կարապետյանին փոխարինելով՝ ոչ միայն իրեն են հեռացնում, հարվածում, այլև ըստ էության ամբողջ ՀՀԿ-ին: Աբրահամյանը այդ տեսանկյունից թերևս իրավացի էր, և դա հաստատում է նաև ՀՀԿ խմբակցության ղեկավար Վահրամ Բաղդասարյանի՝ նախօրեին արած հայտարարությունը, թե իշխանափոխություն լինելու էր ամեն դեպքում՝ անկախ Սերժ Սարգսյանի վարչապետ մնալ-չմնալուց: Իհարկե, Բաղդասարյանն այդ խոսքը ասել էր բոլորովին այլ՝ Ռոբերտ Քոչարյանի հայտարարությանն ի պատասխան, սակայն խոշոր հաշվով դա բավական ներդաշնակ է այն զգուշացումներին կամ կոչերին, որ անում էր Հովիկ Աբրահամյանը «մայր գետ» թափանցած «կեղտոտ ջրերի» մասին: Բայց Հովիկ Աբրահամյանին այն ժամանակ չլսեց ոչ ոք: Մյուս կողմից, սակայն, չէ՞ որ հիմա պարզ է նրանց համար, որ Աբրահամյանն զգալիորեն իրավացի էր իր ահազանգերում: Սրանից բացի, ի վերջո՝ անգամ գժտվելու պարագայում ՀՀԿ-ն ի վերջո պակաս վատ հարաբերության մեջ չէր նաև Քոչարյանի հետ, սակայն նրան պաշտպանել շտապեցին անմիջապես, անհապաղ, իսկ ահա Հովիկ Աբրահամյանի դեմ արդեն փաստորեն երկրորդ գործն է, իսկ ակտիվ պաշտպանություն կարծես թե չկա: Միգուցե սպասում են, այսպես ասած, երրորդ գործին կամ բոլոր գործերին միասին, որպեսզի հետո պաշտպանեն, այսպես ասած, «մեծածախ» պաշտպանությամբ կամ, ինչպես ասում են, «բիրիքով»: Եթե լուրջ, ապա Հովիկ Աբրահամյանն ըստ երևույթին առայժմ որևէ կերպ չի տեղավորվում ներքին այն դիմակայության սխեմաներում, որ ծավալվում է նախկին իշխանական համակարգում Ռոբերտ Քոչարյանի և Սերժ Սարգսյանի առանցքներով: Ավելին՝ քիչ հավանական չէ և այն, որ երկու առանցքում էլ Աբրահամյանը դիտարկվում է որպես անհրաժեշտ «զոհաբերության» ենթակա գործոն, որի վրա հնարավոր կարող է լինել նոր իշխանության հետ որևէ պայմանավորվածություն, ինչի համար ըստ էության պայքարում են այդ երկու առանցքները: Հատկանշական է նաև, որ ակտիվ պաշտպանության ռեժիմում չէ Հովիկ Աբրահամյանը: Նա էլ իր հերթին թերևս ակնկալում է պայմանավորվել երկու առանցքներից մեկի հաշվին:
Հետևեք մեզ Viber-ում
