Հունաստանում արգելափակված է ավելի քան 50 հազար փախստական

Ռուսական «РИА» գործակալությունը հայտնում է, որ միգրացիոն ճգնաժամի հաղթահարմամբ զբաղվող  համակարգող կենտրոնի տվյալների համաձայն՝ մարտի 21-ի դրությամբ Հունաստանում  գտնվում են 50,411 փախստականներ և ներգաղթյալներ: Մի քանի օրվա ընթացքում Թուրքիայի առափնյա շրջաններից  հունական կղզիներ է ներթափանցել 1,662  ներգաղթյալ, որոնց թվում՝  698 հոգի՝ Լեսբոս կղզի և ևս 830 հոգի՝ Խիոս կղզի: Մեկ շաբաթ առաջ Հունաստանում գտնվող ներգաղթյալների թիվը չէր գերազանցում 44,5 հազարը: Հունաստանի և Թուրքիայի միջև Եվրամիության գագաթաժողովի շրջանակներում ձեռք բերված համաձայնույան հիման վրա մարտի 20-ից հետո Թուրքիայի տարածքից անօրինական ճանապարհով Հունաստանի տարածք ներթափանցած միգրանտները հետ են ուղարկվելու Թուրքիա: Ընդ որում այդ գործընթացքում ներգաղթյալների քաղաքացիությունը հաշվի չի առնվելու: Թուրքիան մարտի 20-ից հատուկ ներկայացուցիչների է ուղարկելու հունական կղզիներ, որոնք զբաղվելու են ներգաղթյալների հետ տեղափոխմամբ: