Զբոսաշրջիկները հրաժարվում են մեկնել Թուրքիա

Ստամբուլում ահաբեկչական ակտերի շարքը, որոնցում մեղադրում են «Իսլամական պետությանը» եւ քուրդ գրոհայիններին, հզոր հարված է հասնում Թուրքիայի զբոսաշրջությանը, որը լուսավոր կետ էր այդ երկրի դանդաղող տնտեսական աճի ֆոնին։ Ամռանը տոմսերի ամրագրումը 40 տոկոսով պակասել է նախորդ տարվա համեմատ, իսկ հյուրանոցների պատվերները ավելի քան կրկնակի պակասել են։ Հարյուրավոր հյուրանոցներ, հյուրատներ եւ հյուրանոցա-ժամանցային համալիրներ վաճառքի են հանվել, գրում է Inostmi-ն՝ վկայակոչելով The Wall Street Journal-ը։ Թուրքիայի ՀՆԱ 4 տոկոսը բաժին է ընկնում հենց զբոսաշրջությանը, իսկ այդ ոլորտում աշխատում է ավելի քան 1 մլն մարդ կամ աշխատունակ բնակչության 7 տոկոսը։ Այս մասին են վկայում պաշտոնական վիճակագրական տվյալները։ 2001-2014թթ. զբոսաշրջությունից ստացված եկամուտը եռակի աճել էր՝ հասնելով ռեկորդային 34.3 մլրդ դոլարի։ 2012թ. Ստամբուլը, համաձայն MasterCard-ի ինդեքսի,  համարվում էր ամենահայտնի տուրիստական վայրերից մեկ։ Թուրքիայի հյուրանոցներն ու տուրիստական բիզնեսին  հարված հասցրեցին ռուսական պատժամիջոցները, որոնք ընդունվեցին Սիրիայում Սու-24 օդանավը խոցելուց հետո։ Միգուցե տուրիզմը կարողանար դիմանալ պատժամիջոցների պայմաններում, եթե չլինեին ահաբեկչությունները։ Մահապարտների պայթյունները վախեցրել են եվրոպացի զբոսաշրջիկներին։ Անցյալ աշնանը Անկարայում հանրահավաքի ժամանակ հնչած պայթյունից զոհվել էր ավելի քան 100 մարդ։ Վերջին մեկ ամսում 2 մեքենա է պայթել, ինչը տասնյակ մարդկանց կյանք է խլել» Երկու պայթյուն էլ իրականացրել են քուրդ զինյալները, ինչը նշանակում է ապստամբ քրդերի գործելաոճը փոխվել է իր բազմամյա մարտավարությունը՝ անցում  կատարելով քաղաքացիական բնակչության ու բնակավայրերի դեմ հարձակումներին։