«Ռուսաստանը չի կատարում 2008-ին ստանձնած միջազգային պարտավորությունները»․ Վրաստանի վարչապետ

Վրացական apsny.ge կայքի փոխանցմամբ, Վրաստանի վարչապետ Մամուկա Բախտաձեն մեղադրել է Ռուսաստանին Աբխազիայում և Ցխինվալի շրջանում տեղակայված զորքերի հետ կապված միջազգային պարտավորությունները չկատարելու համար: «Ցավոք, Ռուսաստանը չի կատարում միջազգային պարտավորությունները, որոնք ստանձնել է 2008 թվականին, և շարունակում է մեր տարածքների 20 տոկոսն օկուպացված պահել»,- ասել է Վրաստանի վարչապետը Գերմանիայի կանցլեր Անգելա Մերկելի հետ հանդիպումից հետո կայացած մամուլի ասուլիսի ժամանակ։ «Պատերազմից հետո խիստ նվազել է Աբխազիայի ու Ցխինվալի բնակչության թիվը։Կա միջազգային իրավունք, կան ստորագրված համաձայնագրեր, որոնք պետք է կատարվեն։ Մենք ուրախ ենք, որ ԱՄՆ-ն, Եվրամիությունն ու Գերմանիան երկխոսություն են վարում Ռուսաստանի հետ, որն անպայման արդյունքի կբերի։ Մեր ամենամեծ ցավն այն է, որ օկուպացված տարածքներում կտրուկ նվազում է բնակչության թիվը։ Մինչ պատերազմն Աբխազիայում ապրում էր 530.000 մարդ, իսկ այսօր՝ 100.000-ից քիչ ավելի։ Ցխինվալի շրջանում բնակչությունը նվազել է շուրջ 5 անգամ՝ չգերազանցելով 20.000-ը»,- ասել է Բախտաձեն։ « ԵՄ ու, հատկապես, Գերմանիայի դերը Վրաստանում հակամարտությունների կարգավորման հարցում։ԵՄ-ն ու Գերմանիան բավականին լուրջ դեր ունեն, ուզում եմ բոլորին հիշեցնել, որ միջազգային առաքելություններից այսօր միայն մեկն է գտնվում Վրաստանում, դա ԵՄ առաքելությունն է։ Օգտվելով առիթից՝ պետք է շնորհակալություն հայտնեմ տիկին կանցլերին այդ առաքելության պարտադիր շարունակման համար»,- ընդգծել է Բախտաձեն։ «Աբխազների, վրացիների ու օսերի միջև հարաբերությունները թշնամական չեն, ինչն էլ հիմք է տալիս հարցի քաղաքական լուծումը գտնելու համար։Մեր դիրքորոշումն այն է, որ քաղաքական կամքի առկայության դեպքում բարդ չէ գտնել հակամարտությունների կարգավորման մեխանիզմը», - նշել է վարչապետը։