Ոստիկանության զորքերն այսօրվանից կպահպանեն Հայաստանի պետական սահմանը
Ոստիկանության զորքերի առաջին հերթափոխն այսօր մեկնեց Տավուշի մարզ` մարտական դիրքերը պաշտպանելու: ՀՀ վարչապետ Նիկոլ Փաշինյանը, ով գնացել էր տղաներին ճանապարհելու, ֆեյսբուքյան ուղիղ հեռարձակման միջոցով ներկայացնում էր այդ հանդիսավոր գործընթացը։ Ներկա էր նաև Ոստիկանության պետ Վալերի Օսիպյանը։ «Ոստիկանության զորքերն այսօրվանից մեկնում են մարտական հերթափոխության Հայաստանի պետական սահման։ Նրանք միանում են մեր բանակին` մեր սահմանները ամուր պահելու համար։ Ես արդեն շնորհակալություն եմ հայտնել ոստիկանության զորքերի ծառայողներին և նրանց հարազատներին այս կարևոր առաքելությունն իրականացնելու պատրաստակամության համար»,–ուղիղ հեռարձակման ժամանակ ասաց Նիկոլ Փաշինյանը: Ավելի վաղ ՀՀ Զինված ուժերի գլխավոր շտաբի պետ Արտակ Դավթյանը հայտնել էր, որ ոստիկանության, պաշտպանության նախարարության համատեղ որոշումն է, որ ներքին զորքերի ստորաբաժանումները հերթափոխով սահմանին ծառայություն իրականացնեն: «Ներքին զորքերը պատրաստված են, եթե կառավարության կողմից վերջնական որոշում լինի, կանցնեն նաեւ մարտական հերթապահություն իրականացնելու համար լրացուցիչ կուրսեր», մանրամասնել էր Արտակ Դավթյանը:
Հետևեք մեզ Viber-ում
