Եվրոպայի ամենաերիտասարդ նախարարը Հայաստանից է

«Հայերն այսօր» պարբերականը գրում է․ «Երիտասարդները փոխում են աշխարհը, և ոչ միայն այն պատճառով, որ այն դարձնում են ավելի գեղեցիկ ու համարձակ, այլ նաև նրանք ստեղծում են, ստեղծագործում, հեղափոխություններ նախաձեռնում, հաղթում են, նույնիսկ՝ ղեկավարում: Ու թեև շատ հաճախ նրանց թերահավատորեն են մոտենում, անվանում անփորձ ու ռոմանտիկ, միևնույնն է՝ նրանք կոտրում են կարծրատիպերն ու ասում՝ «երազանքն ու կամքն անպարտելի են»: Ահա այդպես իր երազանքի թևից պինդ բռնեց 27-ամյա Սեբաստիան Կուրցը, ով 2013թ-ի դեկտեմբերին նշանակվեց Ավստրիայի արտաքին գործերի նախարար: Չգիտեմ՝ ամրոցների ու կապույտ լույսերի երկրին ինչով է զարմացրել Կուրցը, սակայն ասում են՝ իր նպատակասլացությամբ երիտասարդ քաղաքական գործիչն անմրցելի է: Ուրիշ, ավելի կամ պակաս դրամատիկ պատմություններով Մոնտենեգրոն ունեցավ 29, Իտալիան՝ 39-ամյա վարչապետ: Արաբական Միացյալ Էմիրություններն էլ մի օր սկսեց երիտասարդությանը նայել 22-ամյա աղջկա՝ Շամմա ալ Մազրուի պայծառ աչքերով: Նա մինչ օրս զբաղեցնում է երիտասարդության հարցերի նախարարի պաշտոնը: Մեզանից շատերին էլ անհավանական էր թվում, որ մի օր Հայաստանը կունենա 27-ամյա նախարար: 2018-ի մայիսի 10-ին շատերը համացանցում փնտրեցին Մխիթար Հայրապետյան անուն-ազգանունը: Հենց այդ օրը՝ սիրո և համերաշխության հեղափոխության քայլարշավի գաղափարի հեղինակը՝ Մխիթարը, նշանակվեց Սփյուռքի նախարար՝ դառնալով Հայաստանի պատմության մեջ և Եվրոպայում գործող ամենաերիտասարդ նախարարը»: