Մանե Թանդիլյանը խնդիրների մասին

Աշխատանքի և սոցիալական հարցերի նախարար Մանե Թանդիլյանն այսօր լրագրողների հետ զրույցում ասաց, որ իրեն հարմարավետ է զգում նախարարի պաշտոնում: Նրա խոսքով՝ իր հայտնի հրաժարականը, ապա դիմումը հետ վերցնելը որևէ կապ չի ունեցել հարմարավետ չզգալու հետ: «Եվ որևէ խնդիր չի եղել ոչ այն ժամանակ, ոչ էլ հիմա: Ես այն ժամանակ էլ եմ եղել Լուսավոր Հայաստանից, այսօր էլ եմ, և կառավարությունում կան բազմաթիվ անդամներ, որոնք Քաղաքացիական պայմանագիր կուսակցությունից չեն: Սրանք քաղաքական գործընթացներ են, որոնք հարմարավետության հետ առնչություն չունեն: Դու կամ աշխատում ես, կամ՝ ոչ: Եթե աշխատում ես, ուրեմն հարմարավետ ես զգում»,- նշեց նախարարը: Նա հիշեցրեց, որ իր հրաժարականը կենսաթոշակային պարտադիր կուտակային բաղադրիչի ներդրմամբ էր պայմանավորված, բայց համաձայնություն է ձեռք բերվել բարեփոխել օրենքը, և հունվարի մեկից բոլորովին այլ օրենք է գործելու: