ԱՄՆ-ի նախագահի խորհրդական. «Կատարից եկած փողերը Թուրքիայի տնտեսությանը չեն կարող փրկել»

Ազգային անվտանգության հարցերով ԱՄՆ-ի նախագահ Դոնալդ Թրամփի խորհրդական Ջոն Բոլթոնը խոսել է վերջին շրջանում լարված թուրք-ամերիկյան հարաբերությունների մասին։ Ինչպես հայտնի է, գլխավոր լարվածության պատճառն այն է, որ Թուրքիայում ազատ չի արձակվում ամերիկացի հոգևորական Էնդրյու Բրանսոնը։ Վերջինս մեղադրվում է լրտեսության և Թուրքիայում ահաբեկչական համարվող կառույցների հետ կապ ունենալու մեջ։ Նրան սպառնում է 25 տարվա ազատազրկում։ Իսրայելում գտնվող Բոլթոնը հարցազրույց է տվել «Reuters» լրատվական գործակալությանը: «Ճգնաժամն ամբողջովին կվերանա, եթե Թուրքիան ամերիկացի հոգևորական Բրանսոնին առանց նախապայմանների ազատ արձակի։ Թուրքիան Բրանսոնին ազատ չարձակելով մեծ սխալ գործեց»,- նկատել է տվել Բոլթոնը։ Թուրք-ամերիկյան լարվածության պայմաններում անդրադառնալով ՆԱՏՕ-Թուրքիա հարաբերություններին՝ ամերիկացի պաշտոնյան ասել է, որ այս պահին որևէ  խոսք չկա ՆԱՏՕ-ից Թուրքիային թեկուզև ժամանակավորապես հեռացնելու մասին։ «Մենք կենտրոնացրել ենք մեր ուշադրությունը, որպեսզի կարգավորենք Բրանսոնի և այլ ամերիկացիների հարցերը, ովքեր անօրինական կերպով անազատության մեջ են գտնվում Թուրքիայում»,-ասել է Բոլթոնը: Իսկ լիրայի արժեզրկման կապակցությամբ ասել է, որ Կատարից եկող փողերը, միևնույն է, չեն կարող փրկել Թուրքիայի տնտեսությունը: Հիշեցնենք, որ վերջերս Թուրքիայի նախագահի և Կատարի Էմիրի միջև ձեռք էր բերվել պայմանավորվածություն։ Դրա համաձայն Կատարը առաջիկայում պետք է 15մլրդ դոլարի չափ ներդրում անի Թուրքիայում։