Մենք Սփյուռքին չենք նայելու որպես բանկոմատ. Սփյուռքի նախարար

Մենք խնդիր ունեինք ներկայացնելու հետհեղափոխական Հայաստանի ասելիքը սփյուռքին։ Կարևորագույն կետերից մեկը՝ Սփյուռքի հանդեպ մեր վերաբերմունքը պետք է փոխվի։ Այս մասին լրագրողների հետ հանդիպման ժամանակ իր աշխատանքային 100 օրը ամփոփելով՝ ասաց Սփյուռքի նախարար Մխիթար Հայրապետյանը։ «Մի քանի անգամ շեշտել եմ, որ չենք նայելու Սփյուռքին որպես բանկոմատ։ Հարաբերությունները պետք է լինեն փոխշահավետ՝ Հայաստանը հոգ է տանում սփյուռքի մասին, սփյուռքը՝ Հայաստանի։ Հայաստանը կլինի ուժեղ, եթե սփյուռքը լինի ուժեղ»,-ասաց Հայրապետյանը: Նախարարը նշեց, որ 100 օրվա աշխատանքային այցի ընթացքում սփյուռքում հանդիպել է ակտիվ փոքրամասնության հետ։ Հուլիսի 24-27-ը Կիպրոսի Հանրապետություն կատարած պաշտոնական այցը 3 նպատակ էր հետապնդում։ Առաջինը՝ նախարարության նախկին ղեկավարության կողմից ստորագրված Հայաստան-Հունաստան-Կիպրոս հուշագրի շարունակականության ապահովումն է, երկրորդը հայ համայնքի հետ հանդիպումներն էին և 3-րդը՝ Մելքոնյան վարժարան կատարած այցը։ «2006 թ-ից կա Մելքոնյան վարժարանի փակման խնդիր։ Այս այցի ժամանակ ես ավելի շատ լսողի դերում եմ եղել։ Ղեկավարությունն ասում է, որ դպրոցականների թիվը պակասում է, ծախսերը շատանում են։ Նրանք մտադիր են վաճառել և ներդրումներ անել Հայաստանում՝ կրթական ծրագրեր իրականացնելու նպատակով։ Մյուս կողմը պնդում է, որ չպետք է փակվի, պատրաստակամություն է հայտնում՝ որոշակի առաջարկներ ներկայացնելու։ Դեռևս քննարկվում է հարցը, որևէ նորություն չեմ կարող ասել այս պահին»,- նշեց նա։ Նախարարը նաև նշեց, որ Սփյուռքի նախարարությունը պատրաստվում է ստեղծել հնարավորություն բոլոր այն մարդկանց համար, ովքեր պատրաստ են աշխատել հանուն Հայաստանի, Արցախի կայուն զարգացման, սփյուռքում հայկական կառույցների զարգացման, Հայաստան-սփյուռք կապի ուժեղացման համար։