Մարտի 1-ի գործով Լևոն Տեր-Պետրոսյանը հրավիրվել է՞ հարցաքննության

ՀԱԿ փոխնախագահ Լևոն Զուրաբյանն Azatutyun.am-ի հետ զրույցում Սերժ Սարգսյանին հարցաքննության հրավիրելու՝ ՀՔԾ-ի մտադրությունը հիմնավորված և պարզ համարեց: «Մի շարք պաշտոնյաներ այդ հարցերը քննարկել են, նրանք ցուցմունքներ ունեն տալու»,- ասաց նա: Լևոն Զուրաբյանը նշեց, որ իրենք ինչ գիտեն, հայտնել են, նորից պատրաստակամություն են հայտնել իրենց ունեցած բոլոր տեղեկությունները և փաստերը տրամադրել քննությանը: Ռոբերտ Քոչարյանի այն ասածին, թե «Ես ինչպե՞ս կարող էի տապալել ինքս իմ կարգը» Զուրաբյանն արձագանքեց՝ դա աբսուրդի թատրոնի հերթական դրսևորումներից մեկն է: Ինչ վերաբերում է 1996 թվականի հետընտրական գործընթացի մեղավորներին բացահայտելուն, նա ասաց. «Եկե՛ք բացահայտենք, ի՞նչ խնդիր ունենք մենք դրա հետ»: Նա նշեց, որ ոչ մի ապացուցողական փաստ չկա դրա հետ կապված: «1995 թվականի Սահմանադրությունը չի արգելել բանակի օգտագործումը արտակարգ դրություններում, քաղաքական ճգնաժամի ժամանակ: Կարող է՝ դա շատ վատ էր, բայց տանկ հանելով՝ 1996 թվականին չէր խախտվում Սահմանադրության որևէ դրույթ»,- ասաց նա: ՀԱԿ փոխնախագահը նշեց, որ «Մարտի 1-ի» գործով Լևոն Տեր-Պետրոսյանը չի հրավիրվել հարցաքննության, և չի կարծում, թե դրա պահանջը կա, քանի որ նա եղել է ցուցարարներից մեկը և տեսել է այն, ինչ ամբողջ ժողովուրդը և իր տեսածը պատմել է մյուս օրը տված ասուլիսի ժամանակ: