Հ. Խուրշուդյանը կհիասթափվի, եթե...
«Ժառանգություն» կուսակցության անդամ Հովսեփ Խուրշուդյանը գրել է. Օգոստոսի 17-ի հանրահավաքին ընդառաջ: Գիտեմ, որ նոր իշխանությունների վրա արտաքին ճնշում կա՝ թե՛ Արեւմուտքից և թե՛ Ռուսաստանից ազատագրված տարածքները Ալիևին վերադարձնելու ուղղությամբ: Կարծում եմ օգտակար կլինի, եթե Նիկոլ Փաշինյանը հանրահավաքին արցախյան հարցում կոշտ հռետորաբանությամբ հանդես գա: Վստահ եմ, որ հավաքված ժողովուրդը նրան կաջակցի: Դա կլինի ուղերձ ոչ միայն նոր իրողությունները դեռ չընկալած Ալիեւին, այլեւ մեր արտաքին գործընկերներին: Անկախ այն բանից, որ հիմա մենք մոտ ենք հայտնվելու նժդեհյան «միայնակ ուժեղի. կարգավիճակում՝ ԲՈԼՈՐԸ պետք է հասկանան-զգան, որ Հայաստանի իշխանությունը բավարար կամք ու քաղաքական արժանապատվություն ունի՝ միակողմանիորեն չզիջելու որեւէ բան արևելյան մոլագար բռնապետիկին, ով պատրաստվում է «գրավել Երևանը», իսկ Հայաստանի ժողովուրդը և համայն հայ ազգը միահամուռ և հուժկու հակահարված կտա ցանկացած արտաքին սադրանքի/արկածախնդրության: Խաղաղության արժանանում է նա, ով պատրաստ է պատերազմի, ընդ որում պատրաստ է նախեւառաջ հոգեբանորեն և ազգովի: Իսկ այս ուղերձը առավել համոզիչ հնչեցնելու համար, պետք է վերահաստատվի համահայաստանյան միասնությունը, յուրաքանչյուր քաղաքացու արժեքը պետության համար եւ այդ քաղաքացու իրավունքների պաշտպանության գործում պետության վճռականությունը: Եւ կհիասթափվեմ, եթե հանրահավաքի շեշտադրումը դրվի առաջիկա ավագանու ընտրությունների և դրանում ՔՊ-ի դերակատարության վրա:
Հետևեք մեզ Viber-ում
