ՌԴ-ի դեմ ԱՄՆ-ի նոր պատժամիջոցներն ուժի մեջ են մտնելու օգոստոսի 22-ից․ դրա դիմաց վճարելու է հասարակ քաղաքացին
Ռուսական ռուբլին վերջին օրերի ընթացքում իջավ` հասնելով անցած երկու տարիների ընթացքում ամենացածր մակարդակին, երբ Միացյալ Նահանգները չորեքշաբթի օրը նոր պատժամիջոցներ սկսեց ընդդեմ Մոսկվայի: Ռուսաստանը հերքում է թունավոր նյութով սպանություններ իրականացնելու մասին մեղադրանքները և միևնույն ժամանակ հայտարարում իր կողմից իրականացվելիք պատասխան քայլերի մասին: Հաղորդում է «Ամերիկայի ձայնը»։ Ռուսաստանն ԱՄՆ-ի ու Եվրոպական միության պատժամիջոցների տակ հայտնվեց դեռեւս 2014-ին` Ուկրաինայից Ղրիմն իրեն բռնակցելուց հետո: Պատժամիջոցներ, որոնք մեծապես են վնասել այս երկրի տնտեսությունը: Ինչպես «Ռոյթըրզ» գործակալության տնտեսական հարցերով փորձագետ Դմիտրի Ժդաննիկովն է ասում, Ռուսաստանի ամենամեծ ընկերության` «Ռոսնեֆտ»-ի շուկայական արժեքը կազմում է 60-70 միլիարդ դոլար, այն դեպքում.. «Այն դեպքում, երբ ԱՄՆ-ում գրեթե նույն կարողությամբ «Էքսոն-Մոբիլ»-ի արժեքը հասնում է 350 միլիարդի»: Կրեմլի խոսնակը փորձում է վստահեցնել ռուսներին, որ երկրի ֆինանսական համակարգը մնում է կայուն: Սովորական քաղաքացիներն էլ այստեղ, կարծես թե, չունեն մեծ մտահոգություններ այս ուղղությամբ: «Մեր երկիրը պիտի արհամարհի բոլոր այս պատժամիջոցները: Մենք շարունակում ենք ապրել այնպես, ինչպես ապրել ենք: Իսկ պատժամիջոցները չեն ազդելու ո՛չ մեր տնտեսության, ո՛չ էլ մեր ամենօրյա կյանքի վրա»,- ասում է նրանցից Արկադի Լյուբարշկիխը: Ֆինանսական կորուստները սակայն նախագահ Պուտինին հետ չեն պահում Ուկրաինայի արեւելքում իրականացված ներխուժումը շարունակելուց եւ այլ երկրների քաղաքական գործընթացներին միջամտելուց: Եվ վերլուծաբաններից շատերն են ասում, որ պատժամիջոցները չեն տալիս ցանկալի արդյունքը: «Արևմուտքը հույս ուներ, որ որքան ճնշում բանեցնի Պուտինի վրա ու որքան խստացնի պատժամիջոցները, այնքան ավելի մեծ դժգոհություն կառաջանա Ռուսաստանի քաղաքական կյանքում ու բիզնես շրջապատում, ինչը կստիպի Պուտինին հրաժարվել իր ուղուց: Սակայն դա տեղի չի ունենում: Ավելին` անցած չորս տարիներին ականատես ենք եղել հակառակ ազդեցության»: Ռուսաստանի դեմ ԱՄՆ-ի նոր պատժամիջոցներն ուժի մեջ են մտնելու օգոստոսի 22-ից: Նախորդների համեմատ դրանք շատ ավելի խիստ են, ու կա կարծիք նաև Ռուսաստանում, որ դրա դիմաց վճարելու է հասարակ քաղաքացին:
Հետևեք մեզ Viber-ում
