Մեր քաղաքականությունը ոչ թե պատժող է,այլ...վարչապետ
«Տնտեսական ցուցանիշների առումով պաշտոնական վիճակագրությունը դրական միտումներ է արձանագրել: Այս տարվա հունիսին տնտեսական ակտիվության ցուցանիշը կազմել է 9.6 տոկոս, իսկ առաջին կիսամյակում՝ 8.9 տոկոս:Հեղափոխությունը, քաղաքական այս փոփոխությունները ոչ միայն անկման չեն բերել, չնայած սովորաբար այդպես է լինում, այլ ընդհակառակը բերել են որոշակի տնտեսական ակտիվության: Դա պայմանավորված է օբյեկտիվ ու սուբյեկտիվ գործոններով, նախ գյուղատնտեսության ոլորտում բերքը լավ է այս տարի, անշարժ գույքի ու շինարարության ոլորտում ակտիվություն կա: Մեր քաղաքականությունը սա խթանելն է, տնտեսության օրինական զարգացմանը չխանգարելն է, երկրորդ, օգնելն է: Դրա համար տնտեսության մեջ յոթը չափում ենք, մեկը կտրում»,- Կառավարության այսօրվա նիստում տեղեկացրեց վարչապետ Նիկոլ Փաշինյանը: «Որևէ ներդրում և ներդրող Հայաստանում ազատ է որևէ կոռուպցիոն պարտավորությունից, որևէ խոչընդոտի չի հանդիպի, եթե օրինական դաշտում է գործում: Իսկ իրավապահ մարմինները պատասխանատվության կենթարկեն բոլոր նրանց, ովքեր որևէ ներդրողի կոռուպցիոն պարտավորություն կառաջադրեն:Հայաստանը մի երկիր է, որտեղ գրագետ ու հետևողական աշխատանքով կարելի է հասնել մեծ արդյունքի»,- ասաց նա: Կառավարությունն իր հերթին, ըստ Փաշինյանի, ամեն կերպ կաջակցի տնտեսվարողներին: Նիկոլ Փաշինյանն անդրադարձավ նաև Պետական եկամուտների կոմիտեի գործունեությանը, ՀԴՄ չտրամադրելու համար տուգանքներին ու տնտեսվարողների դժգոհությանը:«Ուղերձն ի սկզբանե եղել է հստակ՝ կառավարությունը և բոլորը կարող են ակնկալել, որ յուրաքանչյուր քաղաքացի ինքն իր համար ի սկզբանե որդեգրում է օրինապահ քաղաքականություն: Եթե ասված է, որ ՀԴՄ պետք է տրվի, ուրեմն պետք է տրվի: Մեր քաղաքացիները պետք է վստահ լինեն, որ պետբյուջե վճարված գումարներն արդյունավետ ծախսվում են»,- նշեց նա: Մյուս կողմից, Փաշինյանը նշեց, որ ՊԵԿ-ին խնդրում է, որ իր գործունեության մեջ առաջնորդվի այնպես, որ հանկարծ քաղաքացիների շրջանում անարդարության զգացողությունը, որը հաղթահարվել է, չառաջանա: «Եթե որևէ մեկը կասկածի, հետո համոզվի, որ իր նկատմամբ այլ վերաբերմունք կա, քան իր կողքի աշխատողի նկատմամբ է, մենք լուրջ պրոբլեմներ կունենանք: Մեր քաղաքականությունը ոչ թե պատժող է, այլ քաղաքացիների հետ պետք է երկխոսությունը շարունակենք, որպեսզի օրինականությունը պահպանվի»,- հավելեց վարչապետը:
Հետևեք մեզ Viber-ում
