Սակագների հակամարտությունից դեպի առևտրային պատերազմ
Միացյալ Նահանգների ու Չինաստանի միջև հարաբերություններում առկա լարվածությունը շարունակում է սրվել, երբ Չինաստանը սպառնում է բարձր սակագներ հաստատել 60 միլիարդ դոլար արժողությամբ ամերիկյան արտադրության հինգ հազար տեսակի ապրանքների վրա: Մինչ այդ Թրամփի վարչակազմն էր առաջարկել բարձրացնել սակագները 200 միլիարդ դոլարի համարժեք չինական ներկրումների վրա: Հաղորդում է «Ամերիկայի ձայնը»։ ԱՄՆ-ի նախագահ Դոնալդ Թրամփը հայտարարում է, թե Միացյալ Նահանգներն այսօր ունի իր պատմության մեջ ամենահզոր տնտեսությունը, և արդեն ժամանակն է, որ վերանայվեն իր խոսքերով ասած, «ԱՄՆ-ի պատմության մեջ կնքված առևտրային ամենավատ պայմանագրերը»: Թվիթերյան իր էջում Թրամփը գրել է, թե «Սակագները կբարելավեն Ամերիկայի ֆինանսները և կբացեն նոր աշխատատեղեր: Նրա խոսքերով, Ամերիկան ավելի կհարստանա»: Սակայն Կոնգրեսում Թրամփի դաշնակիցների շարքերում էլ կան օրենսդիրներ, որոնք Փոլ Ռայընի նման կարծում են, որ սակագները խնդրի ամենալավ լուծումը չեն: Հանրապետական սենատոր Ռոբ Փորթմանի խոսքերով, գործողությունների դիմելուց ԱՄՆ-ը պիտի լինի շատ զգույշ, որպեսզի խոչընդոտ չհարուցվի առետրին: «Եթե բարձր սակագներ հաստատենք առանց արդարացումների, կհրահրենք պատասխան քայլեր և ապահովելով ավելի բարձր սակագներ մեր արտահանումների վրա»,- ասել է նա: Դեմոկրատ կոնգրեսականներն իհարկե ավելի քննադատորեն են մոտենում հարցին: Սենատոր Հայդի Հայթքամփի խոսքերով, «Չինաստանի հետ առևտրային պատերազմը այն վատագույնն է, որ մեր ֆերմերները կարող են մեզնից սպասել բերքահավաքի այս ժամանակաշրջանում»,- ասել է նա: Թրամփի վարչակազմը հայտարարում է, թե առևտրային պատերազմն ավելի մեծ վնաս կհասցնի Չինաստանին, քան ԱՄՆ-ին, ինչի արդյունքում Պեկինը կհամաձայնվի կնքել ավելի բարենպաստ պայմանագրեր ԱՄՆ-ի հետ: «Մեզ հարկավոր են առևտրային լավ պայմանագրեր: Մենք մեր երկիրը դարձնելու ենք հարուս այնքան, որքան այն չի եղել երբևիցե»,- ասում է Թրամփը: Սակայն արտադրության ու առևտրային որոշ ճյուղերի ղեկավարներ վտանգներ են տեսնում առջևում: Առևտրի պալատը նախազգուշացնում է, որ հաստատվող սակագները կարող են վնասել երկրի տնտեսական բարձր ցուցանիշը, այն ցուցանիշը, ինչի մասին է Թրամփն այսօր խոսում հպարտ ու ինքնագոհ:
Հետևեք մեզ Viber-ում
