Սրտի արատով նորածնին հաջողվել է փրկել 3D տեխնոլոգիայի շնորհիվ

  Չինացի բժիշկները հաջողությամբ վիրահատել են սրտի բնածին ծանր արատով տառապող ինը ամսական նորածնին: Երեխայի օրգանի 3D տպագրական նմուշը վիրահատության ընթացքում օգտագործվել է որպես ակնառու ուղեցույց: Երեխայի սրտի վիրահատությունը հաջողությամբ իրականացվել է  մարտի 11-ին: Ընդ որում, օրգանի նմուշի օգտագործումը բժշկական պրակտիկայում  3D տպագրության տեխնոլոգիաների հնարավորությունների աստիճանական ընդլայնման եւս մի կարեւոր փուլ է ներկայացնում: Համարյա մեկ տարի առաջ Չինաստանում  եռաչափ  տպագրության օգնությամբ սրտի հաջող վիրահատությունների առաջին շարքն էր իրականացվել. նախ հուլիսին` Ցզյանսու նահանգում, իսկ հետո` Անհոյ նահանգի վիրաբույժների կողմից: Վիրահատական հերթական համանման միջամտությունն այս անգամ կատարվել է Ցզիլին նահանգում: Ինը ամսական տղան, որի քաշը վիրահատությունից առաջ ընդամենը   5,6 կգ էր, հիվանդանոց էր տեղափոխվել «սրտի բնածին արատ» ախտորոշմամբ: Դա տեղի էր ունեցել նրա ծննդից կարճ ժամանակ անց, երբ բժիշկները նկատել էին, որ երեխան շնչահեղձություն ունի: Արատը շատ հազվագյուտ եւ բարդ էր, - ասել է Ցզիլինի Ժողովրդական հիվանդանոցում Մանկական սրտավիրաբուժական կենտրոնի գլխավոր վիրաբույժ եւ տնօրեն Չժան Սյուցինը: Մենք էական բարդությունների բախվեցինք դեռեւս վիրահատության պլանավորման փուլում»: Պարզվել է, որ նորածնի մոտ անկանոն են տեղաբաշխված թոքերի բոլոր չորս  զարկերակները, որոնցով արյուն է հասնում ձախ նախասրտին:  Բացի այդ, նրա մոտ միջնախասրտային միջնապատի արատ էր հայտնաբերվել, որը խոչընդոտում էր երկու նախասրտերի միջեւ արյան հոսքին: Նման լուրջ խնդիրների պարագայում գործնականում շանսեր չկային, որ երեխան ողջ կմնա: Չէր կարելի տղայի փոքրիկ օրգանիզմը ավանդական մոտեցմամբ վիրահատական միջամտությունների ենթարկել, այդ պատճառով բժիշկները որոշել են  3D տպագրությունն օգտագործել, որն արդեն ցույց  էր տվել նման դեպքերում իր արդյունավետությունը: Չժանի խոսքով, հիվանդի սրտի 3D պատճենը վերարտադրում էր նրա բոլոր արատները.  «Նմուշն աչքի առաջ ունենալով` մենք ճշգրտորեն գիտեինք, թե ինչ պիտի անենք` ընդհուպ մինչեւ այն, թե ինչ երկարություն պիտի ունենար յուրաքանչյուր կտրվածքը: Դա մեզ թույլ տվեց վիրահատությունն ավարտել երկու անգամ ավելի արագ, քան սպասում էինք»: Այժմ տղան վերականգնվում է ընդհանուր հիվանդասենյակում, վերականգնումից հետո կկարողանա երկար եւ առողջ կյանք վարել: