Թուրքիան կարող է ԵՄ հետ ոչ վիզային ռեժիմ ստանալ

BBC-ի ռուսական ծառայության փոխանցմամբ՝ Թուրքիան անհրաժեշտ բոլոր պայմանները կատարելու դեպքում կարող է մինչև հունիսի վերջ ստանալ ԵՄ երկրների հետ ոչ վիզային ռեժիմ։ Այդ մասին նշված է փախստականների խնդրի լուծման շուրջ գումարված ԵՄ-Թուրքիա գագաթնաժողովի արդյունքներով ընդունված որոշման մեջ: Որոշման համաձայն՝ պետք է արագացնել վիզային ռեժիմի ազատականացմանն առնչվող «ճանապարհային քարտեզի» իրագործումը, որպեսզի հնարավոր լինի Թուրքիայի քաղաքացիների համար ոչ վիզային ռեժիմ սահմանել 2016 թվականի հունիսի վերջից ոչ ուշ։ Թուրքիայի վարչապետ Ահմեթ Դավութօղլուն հայտարարել է, որ Թուրքիան արդեն իսկ կատարել է 72 պահանջից 37-ը և հուսով է մնացյալ պահանջներն իրագործել մինչև մայիսի սկիզբ։