Խնդրահարույց է մահաբեր սպառազինության մատակարարումն Ադրբեջանին . Տիգրան Բալայան (տեսանյութ)

ՀՀ ԱԳՆ մամուլի խոսնակ Տիգրան Բալայանը լրագրողների հետ ճեպազրույցում հայտնեց,որ  շարունակում են  հետամուտ լինել Սլովակիայից Ադրբեջան սպառազինությունների ապօրինի փոխանցման խնդրին, հայկական կողմն այդ հարցը բարձրացրել է նաև ԵԱՀԿ շրջանակներում՝ նկատի ունենալով, որ Սլովակիան գալիք տարի նախագահելու է այդ միջազգային կազմակերպությունում: Լրագրողների այն հարցին, թե ՀԱՊԿ անդամ երկու երկիր՝ Ռուսաստանն ու Բելառուսը, հսկայական սպառազինություն են մատակարարում Ադրբեջանին և ո՞րն է լինելու Հայաստանի իշխանությունների վերաբերմունքը, ինչպե՞ս է Հայաստանը բարձրացնում այդ հարցը Ռուսաստանի և Բելառուսի ներկայացուցիչների հետ հանդիպումների ժամանակ, Տիգրան Բալայանն ասել է. «Վարչապետն անձամբ անդրադարձել էր այդ հարցին, այդ մասին քննարկել էր Բելառուսի նախագահի հետ հանդիպման ժամանակ: Նոր և հին իշխանությունները բարձրաձայնել են այդ հարցի մասին և՛ ռուսաստանցի, և՛ բելառուսցի գործընկերների առջև: Մեր դիրքորոշումը հետևյալն է, որ խնդիրը չկենտրոնանա կոնկրետ մեկ երկրից մատակարարումների վրա, օրինակ, Սլովակիայից մատակարարումներն օրենքի, գործող միջազգային իրավունքի խախտում են, և երբ տրված է վերջնական օգտագործողի սերտիֆիկատը մեկ երկրի համար, բայց այդ զենքը, բոլորը փայլուն գիտեն, որ հայտնվում է մեկ այլ երկրում: Ինչ վերաբերում է օրենքի շրջանակներում զենքի մատակարարումներին, մեր հնարավորություններն այդ դեպքում սահմանափակ են, ազդելու իրավական որևէ մեխանիզմ մենք չունենք: Մենք շարունակում ենք վերահաստատել մեր այն պնդումը, սկզբունքային դիրքորոշումը, որ խնդրահարույց է ցանկացած զենքի, մահաբեր սպառազինության մատակարարումն Ադրբեջանին՝ հաշվի առնելով Ադրբեջանի անկանխատեսելի արտաքին քաղաքականությունը, հաշվի առնելով Ադրբեջանում մարդու իրավունքների խայտառակ վիճակը, որ այդ զենքը կարող է օգտագործվել ոչ միայն պոտենցիալ արտաքին հակառակորդների դեմ, այլ սեփական բնակչության դեմ»: