Ինտենսիվ քննարկումներ են ընթանում .Տիգրան Բալայանը՝ Յուրի Խաչատուրովի ետկանչի մասին
«ՀՀ քայլերն ամբողջովին համապատասխանում են ՀԱՊԿ իրավական կարգավիճակի մասին համաձայնագրի դրույթներին»,- այս մասին այսօր լրագրողների հետ հանդիպմանն ասաց ՀՀ ԱԳՆ մամլո խոսնակ Տիգրան Բալայանը՝ անդրադառնալով ՀԱՊԿ գլխավոր քարտուղար Յուրի Խաչատուրովի շուրջ տեղի ունեցող զարգացումներին: Տիգրան Բալայանն ասաց, որ ինչպես նշել էին շաբաթ օրը ՀՀ ԱԳՆ տարածած մեկնաբանության մեջ, հայկական կողմն առաջարկել է ՀԱՊԿ գործընկերներին սկսելու գլխավոր քարտուղարի փոխարինման գործընթացը: «Այս առնչությամբ ինտենսիվ քննարկումներ են ընթանում մեր գործընկերների հետ»,-ասաց Բալայանը: «ՀԱՊԿ-ում մեր նախագահության ժամանակահատվածներում, մեր նախաձեռնություններով ամեն ինչ արել ենք, որպեսզի ՀԱՊԿ-ն առավել ամրապնդվի և ուժեղանա, և այս քայլը հարկավոր է դիտարկել հենց այդ համատեքստում»,- ասել է Տ. Բալայանը: Նա նաև հայտնել է, որ ՀԱՊԿ-ն կշարունակի ղեկավարել Յուրի Խաչատուրովը, և քանի ՀԱՊԿ-ն որոշում չի կայացրել նրան փոխարինելու վերաբերյալ, նա կշարունակի մնալ ՀԱՊԿ գլխավոր քարտուղար: Ըստ ԱԳՆ մամուլի խոսնակի՝ դեռ ժամանակավրեպ է խոսել նոր թեկնածուի մասին, հայկական կողմն առայժմ սպասում է իր առաջարկի վերաբերյալ կազմակերպության որոշմանը:
Հետևեք մեզ Viber-ում
