Վստրեչի Ապերին Դուբայում ձերբակալելու վերաբերյալ որևէ պաշտոնական տեղեկություն ՀՔԾ-ին չի հայտնվել

Քրեական աշխարհում հայտնի, Վստրեչի Ապերին՝ նույն ինքը Արամ Վարդանյանին, գիշերը Դուբայի օդանավակայանում ձերբակալելու մասին որևէ պաշտոնական տեղեկություն ՀՔԾ-ին չի հայտնվել: Այդ մասին «Փաստինֆո»-ի հարցին ի պատասխան ասաց ՀՔԾ մամլո խոսնակ Մարինա Օհանջանյանը: Նշենք, որ Վարդանյանին Դուբայի օդանավակայանում ձերբակալելու վերաբերյալ տեղեկություններն այսօր տարարծվել էր լրատվամիջոցներում: Արամ Վարդանյանի նկատմամբ Հատուկ քննչական ծառայության կողմից հետախուզում է հայտարարվել, նա մեղադրյալի կարգավիճակ ունի՝ անձի առևանգումը կազմակերպելու գործի շրջանակներում: Հիշեցնենք, որ ըստ ՀՔԾ պաշտոնական տեղեկատվության՝ Ա. Վ.-ն կենցաղային հարցերի շուրջ պարզաբանումներ կատարելու և Գ. Հ.-ին պատժելու նպատակով նախնական համաձայնություն է ձեռք բերել մի խումբ անձանց հետ` վերջինիս առևանգումը կազմակերպելու համար: Հիշյալ անձինք իրենց հանցավոր նպատակն իրագործելու դիտավորությամբ, Ա. Վ.-ի ղեկավարությամբ և անմիջական մասնակցությամբ, 2017թ. հուլիսի 17-ին Երևան քաղաքի Նորագավիթ թաղամասում գտնվող սուպերմարկետի շրջակայքից բռնության գործադրմամբ առևանգել են Գ. Հ.-ին և տեղափոխել Երևան քաղաքի բնակարաններից մեկը, որտեղ Ա. Վ.-ն ծեծի է ենթարկել վերջինիս և զենքով սպառնացել սպանել նրան: Շուրջ 3 ժամ Գ. Հ.-ին անազատության մեջ պահելուց հետո Ա. Վ.-ն սպանության սպառնալիքի ներքո նրանից պահանջել է լքել Հայաստանի Հանրապետության տարածքը: Նույն օրը՝ 17.07.2017թ.-ին, Գ. Հ.-ն մեկնել է ՀՀ-ից և վերադարձել 2018թ. ապրիլ ամսին: Վերը նշված հանցավոր արարքի կատարման համար 18.06.2018թ.-ին Ա. Վ.-ն քրեական գործով ներգրավվել է որպես մեղադրյալ ՀՀ քրեական օրենսգրքի 131-րդ հոդվածի 2-րդ մասի 1-ին, 2-րդ և 3-րդ կետերով: Նույն օրը նրա նկատմամբ որպես խափանման միջոց է ընտրվել կալանավորումը և հայտարարվել հետախուզում: