Քոչարյանի մասով քրեական գործը կարճվելու է. Ռուբեն Սահակյան

ՀՀ 2-րդ նախագահ Ռոբերտ Քոչարյանի փաստաբան Ռուբեն Սահակյանը գտնում է, որ քրեական գործը կարճվելու է՝ «փորձն է ցույց տալիս»: Փաստաբանը չի կասկածել և ի սկզբանե հասկացել է, որ Հատուկ քննչական ծառայությունը կալանավորելու է Ռոբերտ Քոչարյանին: Մարտի 1-ի վերաբերյալ քրեական գործը, Սահակյանի գնահատմամբ, մեծ գործ է, որի մի դրվագը վերաբերում է Ռոբերտ Քոչարյանին, սակայն ոչ մի հիմնավոր կասկած չկա: Ռուբեն Սահակյանը հայտնեց, որ հուլիսի 26-ի նիստը սկսելուց առաջ խնդրել են դատարանին, որ իրենց բավարար ժամանակ տրամադրվի կալանավորման միջնորդության քննարկմանը պատրաստվելու համար։ «Ասեմ, որ ՀՔԾ-ում մեզ տրվեց 136 էջ ունեցող փաստաթուղթ, ապա ևս 15 էջ: Դրանց 99 տոկոսը տպագիր տեքստեր են: Պատկերացնո՞ւմ եք ինչ ծավալի նյութ է կարդալու և մարսելու համար: Այն անձամբ ինձ համար կպահանջեր 12 ժամ: Ի դեպ ասեմ, որ Եվրոպական կոնվենցիայի 6-րդ հոդված կետերից մեկով նշվում է, որ յուրաքանչյուր ոք իրավունք ունի ունենալու բավարար ժամանակ իր պաշտպանությունը նախապատրաստելու համար: Դատավորը մեզ լսեց և մերժեց: Պատճառաբանություն չի բերվել: Նման դատավարներն ուղղակի որոշում են»: