Հայրենադարձության հետ կապված օրենսդրական հակասություն կա. Դավիթ Անանյան

ՀՀ կառավարությանն առընթեր պետեկամուտների կոմիտեի նախագահ Դավիթ Անանյանը նշել է, որ Հայաստանի ներքին օրենսդրության և ԵԱՏՄ իրավակարգավորումների հակասություն կա: Անդրադառնալով լրագրողի նշած դեպքին, երբ անձը Հայաստան վերադառնալիս փորձել է անցկացնել իր անձնական գույք համարվող ավտոմեքենայի անվադողերը, սակայն նրանից պահանջել են դրանք մաքսազերծել, փաստել է, որ վերը նշված հակասությունը վերաբերում է նաև դրան:  «Որքանով ինձ է հայտնի, այդ անձը ԵԱՏՄ տարածքից չի վերադարձել Հայաստան: Իսկ ընդհանրապես հայրենադարձության հետ կապված օրենսդրական հակասություն կա մեր ներպետական օրենքների և ԵԱՏՄ իրավակարգավորումների միջեւ: Մեր օրենսդրությամբ՝ հինգ տարի և ավելի ժամանակ դրսում գտնվող մեր հայրենակիցները, երբ վերադառնում են Հայաստան, անձնական գույքի համար չպետք է մաքսատուրք վճարեն: ԵԱՏՄ իրավակարգավորումներով՝ այդ նորմը տարածվում է օտարերկրյա քաղաքացիների վրա և մեր քաղաքացիների վրա՝ միայն տրանսպորտային միջոցների գծով»,- օրենսդրական տարբերությունները նկարագրեց ՊԵԿ նախագահը: Նրա խոսքով՝ եթե Հայաստանը նախընտրի առաջնորդվել իր իրավակարգավորումներով, կարող է իրավական խնդիրներ ունենալ՝ կապված ԵԱՏՄ-ում ստանձնած իր պարտավորությունների մասով: