Գերմանիայի կանցլերը կայցելի՞ Հայաստան
Հայկական լրատվամիջոցները հուլիսի 21-ին տեղեկություն են հրապարակել այն մասին, որ Գերմանիայի կանցլեր Անգելա Մերկելն օգոստոսին պատրաստվում է այցելել Հայաստան: «Արմենպրես»-ը փորձեց ճշտել տեղեկությունը կանցլերի գրասենյակից: Գերմանիայի կառավարության խոսնակը, սակայն, որևէ մեկնաբանություն չտվեց հնարավոր այցի վերաբերյալ: «Կանցլեր Մերկելի հանդիպումների ու այցերի մասին մենք սկզբունքայնորեն հաղորդում ենք նախորդող ուրբաթ օրը»,- «Արմենպրես»-ի հետ զրույցում ասաց Գերմանիայի կառավարության խոսնակը: Նշենք, սակայն, որ այս պահին կանցլերի պաշտոնական կայքում Հայաստան այցելության մասին որևէ տեղեկություն հրապարակված չէ: Համաձայն մի շարք լրատվամիջոցների հրապարակումների՝ Անգելա Մերկելը Հայաստանում կլինի օգոստոսի 24-ին՝ Հարավային Կովկաս այցի շրջանակում: Ըստ տարածվող լուրերի՝ կանցլերը օգոստոսի 23-ին կայցելի Վրաստան, իսկ օգոստոսի 25-ին՝ Ադրբեջան:
Հետևեք մեզ Viber-ում
