Պե՞տք է արդյոք պատասխանել վիրավորանքին
Արամ Աբրահամյանը գրում է.Ազգային ժողովի փոխնախագահ Արփինե Հովհաննիսյանը շատ սխալ է վարվել՝ որեւէ անձի կամ որեւէ հանրության հասցեին ասելով «մտավոր հետամնաց»: Դա իսկապես դատապատելի է: Չի կարելի վիրավորել որեւէ մեկին՝ լինի նա պատգամավոր, բանվոր, գործարար, թե գործազուրկ: Դա չի կարելի է անել ոչ բանավոր, ոչ գրավոր, ոչ միացրած տեսախցիկներով, ոչ անջատված, ոչ լայն, ոչ նեղ շրջանակներում: Ավելացնեմ իմ կողմից՝ դա լավ չի անելն անգամ մտքում: (Իմ լրագրողական գործունեության ընթացքում պատահել է, որ ես վիրավորել եմ այս կամ այն անձին, ինչի համար խորապես ցավում եմ): Բայց եկեք 180 աստիճանով շրջենք իրավիճակը եւ ենթադրենք, որ Դանիել Իոաննիսյանը, կամ որեւէ ՔՊ-ական է «մտավոր հետամնաց» անվանել որեւէ ՀՀԿ-ականի: Ինչպես կարձագանքեր «ֆեյսբուքահայությունը», կարելի է ենթադրել. «Վախ, ես քու ցավը տանեմ, տոշնի էլ ասացիր, իսկական մտավոր հետամնաց ա, հըլը քիչ ես ասել»: Երկու տասնյակ հասարակական կազմակերպություններ հանդես կգայի՞ն՝ դատապարտելով այդ վիրավորանքը, այդ ՔՊ-ականի տան մոտ «զայրացած քաղաքացիները» ցույցեր կանեի՞ն: Կարծում եմ, որ ոչ: Կամ՝ քի՞չ է եղել, որ նույն Արփինեի (նաեւ այս՝ վերջին առիթով) կամ Շուշան Պետրոսյանի հասցեին համացանցում վերջին հայհոյանքներն են գրվել եւ արժանացել հազարավոր «լայքերի»: Որեւէ հ/կ ասե՞լ է. որ դա լավ չէ, որ վիրավորել չի կարելի: Վարվիր ուրիշի հետ այնպես, ինչպես կցանկանայիր, որ քեզ հետ վարվեին՝ հայտնի աստվածաշնչյան ճշմարտություն է: Իհարկե, այդ օրինաչափությունը, կասեի անգամ՝ տիեզերական օրենքը վերաբերում է նաեւ ՀՀԿ-ականներին: Նրանք մեկ տասնամյակից ավելի է՝ վիրավորել են հասարակությանը, իրենց արհամարհանքով, մեծամտությամբ, ամբարտավան կեցվածքով: Եթե մարդն իր նկուղում խոշտանգում է մեկ այլ մարդու, որպեսզի վերջինս հրաժարվի իր բիզնեսից, դա ոչ միայն ծանր հանցագործություն է, դա նաեւ վիրավորանք է մեզ բոլորիս հանդեպ, որովհետեւ խոշտանգողը վստահ էր, որ երբեք չի պատժվի: Եվ ի՞նչ: Հանցագործությանը պետք է պատասխանել օրենքով նախատեսված պատժով: Իսկ վիրավորանքի՞ն: Ահա այստեղ է, որ իմ եւ մեր հասարակության (գուցե մարդկության) մեծ մասի կարծիքը չի համընկնում. այսօր ինձ թվում է, որ վիրավորանքին պետք չէ որեւէ ձեւով պատասխանել: Իսկ Արփինեին ու մնացած իշխանամետ եւ ընդդիմադիր գործիչներին, ներկա եւ նախկին իշխանավորներին, ուզում եմ հիշեցնել Ալեքսանդր Պուշկինի խոսքերը՝ «учитесь властвовать собой»: Մոտավոր թարգմանությունն է՝ սովորեք ձեզ տիրապետել:
Հետևեք մեզ Viber-ում
