Նոր մանրամասներ՝ «օրենքով գող» Կոբա Շեմազաշվիլիի՝ Հայաստանում գտնվելու փաստից

SHAMSHYAN.com-ի տեղեկություններով՝ ոստիկանության կազմակերպված հանցավորության դեմ պայքարի գլխավոր վարչության կազմակերպված հանցավորության խմբերի դեմ պայքարի բաժնի ծառայողները ստացված օպերատիվ տվյալներն իրացնելով՝ պարզել են, որ 2016 թվականի փետրվարին Իսպանիայի Թագավորության իրավապահների կողմից մեղադրանքով միջազգային հետախուզման մեջ գտնվող 44-ամյա Կոբա Շեմազաշվիլին Հայաստան մուտք է գործել կեղծ անձնագրով։ Ինչպես հայտնում է ֆոտոլրագրող Գագիկ Շամշյանը, ոստիկանության 6-րդ գլխավոր վարչության և Հայաստանում Ինտերպոլի ազգային կենտրոնական բյուրոյի ծառայողները համապատասխան ստուգումներ կատարելով՝ պարզել են, որ Կ. Շեմազաշվիլին Հայաստան մուտք է գործել Ուկրաինայի Հանրապետության քաղաքացի, 44-ամյա Արկադի Մարտիրոսյանի անվամբ տրված անձնագրով։ Ֆոտոլրագրողի տեղեկություններով՝ Կ. Շեմազաշվիլին, ով համարվում է «օրենքով գող», Հայաստան է այցելել 2016 թվականին և Հայաստանում է մնացել մինչև 2018 թվականի մայիսը։ Փաստի առթվի ոստիկանության 6-րդ գլխավոր վարչությունում նյութեր են նախապատրաստվում։ Գ. Շամշյանի տեղեկություններով՝ Կ. Շեմազաշվիլին մեղադրվում էր Իսպանիայի քրեական օրենսգրքի 301, 515 և 139 հոդվածների (սպանության փորձ, փողերի լվացում) հատկանիշներով և նրա նկատմամբ խախանման միջոց է ընտրված եղել կալանավորումը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: