Ով կփոխարինի Վարդանյանին

Հրապարակ օրաթերթը գրում է. «Հայաստան համահայկական հիմնադրամի» տնօրեն Արա Վարդանյանը երեկ մի սրտառուչ տեքստ էր տարածել, ներողություն խնդրել բոլորից եւ շեշտել, որ խորը ցավ է ապրում, որ ակամայից ստվերվեց «Հայաստան համահայկական հիմնադրամի» անունը: Իսկ «ակամայից ստվերվեց» հիմնադրամի անունը, քանի որ պարզվել էր, որ, տնօրինելով հիմնադրամին տրամադրված 25 միլիոն դրամի վարկային գծով բանկային քարտը, Վարդանյանը դրա միջոցներն օգտագործել է անձնական նպատակներով, այդ թվում՝ տարբեր առցանց խաղատներում խաղադրույքներ կատարելով: Ըստ իր խոսքերի, վարկային քարտից վատնած միջոցները Վարդանյանը հետ է վերադարձրել հիմնադրամին՝ անձնական միջոցները կանխիկ մուտքագրելով հիմնադրամի հաշվապահություն՝ դրանով իսկ թաքցնելով գումարների վատնման հանգամանքը: Ըստ ԱԱԾ-ի՝ միայն վերջին շաբաթվա ընթացքում Վարդանյանը հիմնադրամի բանկային քարտից մոտ 14 միլիոն դրամ է փոխանցել օնլայն խաղատներին, իսկ 2016-2018 թվականներն ընկած ժամանակահատվածում այդ գումարը կազմել է շուրջ 130 մլն դրամ: Դրանից հետո դատարանը 1մլն դրամ գրավի դիմաց ազատ արձակեց Վարդանյանին։ Փաստաբանները պնդում են, որ նա 0 դրամի վնաս է հասցրել հիմնադրամին, իսկ Վարդանյանը չի ընդունում հիմնադրամից յուրացումներ կատարելու եւ լիազորությունները չարաշահելու մեղադրանքը: Ազատ արձակվելուց հետո նա աշխատանքի է գնացել, մյուս օրն էլ հրաժարական ներկայացրել: Նախագահ Արմեն Սարգսյանը, որպես հիմնադրամի հոգաբարձուների խորհրդի նախագահ, ի գիտություն է ընդունել Արա Վարդանյանի հրաժարականի դիմումը: Ըստ սահմանված կարգի՝ դիմումը կուղարկվի հոգաբարձուների խորհրդի անդամներին՝ հաստատման համար, որից հետո կստեղծվի հատուկ հանձնաժողով, որը մրցութային կարգով պետք է ընտրի հիմնադրամի նոր գործադիր տնօրեն: Այս ընթացքում հոգաբարձուների խորհրդի կողմից կնշանակվի ժամանակավոր պաշտոնակատար: Թե ով կլինի նա, հիմնադրամում գաղափար չունեն: