Ամուլսարի հանքի շահագործման մեկնարկը՝սեպտեմբերին

«Իրատես» թերթը գրում է. «Օրերս էլ Նիկոլ Փաշինյանը Ջերմուկ էր այցելել՝ դեպի հանք տանող մի քանի ճանապարհները փակած ջերմուկցիների հետ առկա հարցերը քննարկելու ու խնդիրներին տեղում ծանոթանալու համար: Մի քանի ժամ տևած հանդիպումից հետո, սակայն, Ամուլսարի խնդիրն այդպես էլ առկախված մնաց: «Լիդիան Արմենիա» ընկերության ներկայացուցիչները փոխանցեցին, որ հանքը շահագործելու հարցում չեն պատրաստվում զիջման գնալու, ջերմուկցիներն էլ ընդգծեցին՝ հետքայլ չեն անելու ու ճանապարհները չեն բացելու:

Փաստորեն, վարչապետի այցը Ջերմուկ ոչինչ չտվեց: Ավելին, «Լիդիանի» ներկայացուցիչների հետ քաղցր-մեղցր զրույցները վկայում էին, որ Փաշինյանի կառավարությունը հանքի շահագործման լիցենզիան չի պատրաստվում չեղարկելու, ավելին՝ կառավարության մյուս անդամների, ինչպես նաև «Ելք» խմբակցության պատգամավորների հայտարարություններն այն մասին, թե Հայաստանում պետք է լինի եվրոպական չափանիշներով աշխատող հանք և դրա նախատիպը հենց «Ամուլսարն է», գոնե ենթադրելու տեղիք են տալիս՝ «Ամուլսարի» կարմիր ժապավենները մոտ ապագայում կտրվելու են:

«Իրատեսի» աղբյուրները հուշում են, որ այդ «մոտ ժամանակը» աշունն է: «Լիդիան Արմենիայի» ներքին խողովակներով ճշտեցինք, որ հանքի շահագործման մեկնարկը տրվելու է սեպտեմբերին: Հավաստիացրին նաև, որ հանքի շահագործումից Ջերմուկի բնությունը չի տուժի, իսկ հանքային ջրերին վտանգ չի սպառնա»: