Եթե պետք լինի, ամեն տեղ էլ կհասնի. Փաշինյանը՝ Սերժ Սարգսյանի նկատմամբ հնարավոր գործողությունների մասին

Կենտրոնական հավաքակայանում լրագրողների հետ զրույցում ՀՀ վարչապետ Նիկոլ Փաշինյանը նախ հայտարարեց, որ իրենց նպատակը այն է, որ կոռուպցիա կա և մեծ ծավալների, այդ թվում՝ և՛ Զինված ուժերում, և ինչքան որ կա, այնքան բացահայտվի։ «Ես Ազգային անվտանգության ծառայության առաջ խնդիր չեմ դրել՝ գնացեք խոշոր բացահայտում արեք, ես ասում եմ, որ պետք է լինի օրինականություն, Ալեքսանդր Սարգսյանի ընտանիքի առնչությամբ մարդկանց թվում է, թե կառավարությունում ասել ենք՝ այսօր մենք բերման ենք ենթարկում Ալեքսանդր Սարգսյանին, եևգնում են բերման ենթարկելու։ Եղել է քաղաքացի, որը դիմում է գրել ինձ, որ ես այսպիսի խնդրի առաջ եմ կանգնել, որ իմ ձեռքից այդ նկարները խլել են, ես մակագրել եմ ԱԱԾ: ԱԱԾ–ն հրավիրել է այդ մարդուն, նա հաղորդում է տվել հանցագործության մասին և գործին ընթացք է տրվել»,-ընդգծեց Փաշինյանը: Ինչ վերաբերում է նրան, որ Սերժ Սարգսյանի եղբորը՝ Ալեքսանդր Սարգսյանին երկու անգամ ԱԱԾ-ն բերման է ենթարկել ու ազատ արձակել, Փաշինյանն ասաց. «Կոնկրետ 2 դեպքով, շատ հիմնավոր պարագայով բերման են ենթարկվել, երբ ստուգվել են փաստերը, և այդ պահին ձերբակալելու որոշում կայացնելու օրինական հիմք չի եղել: Թող որևէ մեկը չմտածի՝ ես զանգում, ասում եմ էս ինչին ձերբակալեք, էս ինչին բաց թողեք, մյուսին հետապնդել, ես մի խնդիր եմ դնում՝ բոլոր գործողությունները պետք է լինեն 100 տոկոսանոց օրինական, օրենքն է ասում ում բերման ենթարկեն և ում ազատեն»: Հարցին՝ հնարավո՞ր են այդ գործողությունները հասնեն 3-րդ նախագահ Սերժ Սարգսյանին, հայտնեց. «Ցանկացած հետաքննություն, եթե հասնի Սերժ Սարգսյանին, կհասնի, եթե պետք լինի տուն, կհասնի,ամեն տեղ էլ կհասնի, բայց դա ոչ թե ես եմ որոշում, այլ փաստերը, ընթացակարգերը, օպերատիվ տեղեկություններն են որոշում»: