Քոչարյանի կապը առասպելական ունեցվածքների, «Հոկտեմբերի 27»-ի գործի հետ

Ռոբերտ Քոչարյանի գրասենյակի ղեկավար Վիկտոր Սողոմոնյանը ժխտեց Քոչարյանի կարողությունների մասին լուրերը:Հարցին` արդյոք Ռոբերտ Քոչարյանը մեծ կարողություններ չունի, Սողոմոնյանը պատասխանեց. «Իհարկե՝ ոչ: Իսկ դուք կարո՞ղ եք թվարկել այդ մեծ կարողությունը։ Եթե չեմ սխալվում, ըստ մամուլի տեղեկությունների, իրեն են պատկանում բոլոր բանկերը, բացի HSBC-ից»: Երկրորդ նախագահի գրասենյակի ղեկավարի խոսքով՝ ցանկացած բացահայտում, ցանկացած գործով, որն ինչ-որ կերպ առնչվում է Ռոբերտ Քոչարյանին, լինելու է իր օգտին: «Վստահ եմ, որ այն ժամանակ, երբ փաստերը կպարզվեն, ոչ միայն այս գործով, այլեւ շատ հարցերով, որոնք կապված են օրինակ՝ առասպելական ունեցվածքների հետ, «Հոկտեմբերի 27»-ի գործերի հետ, հանրությունը մեծ զարմանք է ապրելու, որ նախագահ Քոչարյանը դրանց հետ որեւէ առնչություն չունի»,- ասաց  Սողոմոնյանը: Լրագրողի դիտարկմանը, թե կան ձայնագրություններ, որտեղ գործով մեղադրյալ պաշտպանության նախկին նախարար Միքայել Հարությունյանն ասում է, որ գործել է գերագույն գլխավոր հրամանատարի՝ Ռ. Քոչարյանի ցուցումով, Վիկտոր Սողոմոնյանն ասաց.«Եկեք դատենք միասին, փորձենք հասկանալ: Ստացվում է, որ սահմանադրական կարգ է եղել, որի կրողը եղել է հաղթած ընդդիմությունը, որը չի հաստատվում ո՛չ ԿԸՀ, ո՛չ ՍԴ որոշումով: Պաշտպանության նախարարությունն էլ այդ կարգը տապալել է: Սա ծաղր է օրենքի նկատմամբ»: