Մեծ Բրիտանիան կարող է չլքե՞լ ԵՄ-ն

Ինչպես հայտնում է BBC-ին,  Մեծ Բրիտանիայի վարչապետ Թերեզա Մեյի հետ ունեցած տարաձայնությունների պատճառով հրաժարական է տվել ԵՄ-ից Մեծ Բրիտանիայի դուրս գալու՝ Brexit-ի հարցերով նախարար Դեւիդ Դեւիսը։ Նա հրաժարական է տվել «մեղմ Brexit-ի» ուղենիշի հետ ունեցած տարաձայնությունների պատճառով: «Մեծ Բրիտանիայի կառավարության մարտավարության եւ ռազմավարության մեջ նկատվող միտումներն ավելի ու ավելի են նվազեցնում Բրիտանիայի՝ միասնական շուկայից ու մաքսային միությունից դուրս գալու հնարավորությունները»,- հայտարարել է Դեւիդ Դեւիսը: Նշվում է, որ հրաժարականի մասին նա հայտարարել է հուլիսի 8-ին՝ Համայնքների պալատում Մեյի ելույթի նախօրեին, ինչն ըստ փորձագետների հզոր հարված կհասցնի վարչապետ Թերեզա Մեյի դիրքերին։ Բրիտանական մամուլը գրում է այն մասին, որ կառավարությունն ընկղմվել է քաոսի մեջ։ Ելույթի ժամանակ վարչապետը պետք է ներկայացնի կառավարության կողմից հավանության արժանացված Brexit-ի ռազմավարությունը։ Brexit-ի պլանը նախատեսում է միությունը լքելու «մեղմ» տարբերակ․ արդյունաբերական եւ գյուղատնտեսական ապրանքների համար ԵՄ-ի հետ ազատ առեւտրի գոտու ստեղծում եւ բրիտանական սահմաններին միության մաքսային չափորոշիչների պահպանում։