Դավիթ Հարությունյանն ու Սերգեյ Բագրատյանը վիճեցին

ԱԺ-ում ընտրական օրենսգրքի փոփոխություններից հարցով աշխատանքային խմբի նիստում վիճեցին ՀՀԿ ներկայացուցիչ Դավիթ Հարությունյանը եւ «Ծառուկյան» խմբակցության պատգամավոր Սերգեյ Բագրատյանը: Բանն այն է, որ Դավիթ Հարությունյանը նշեց, որ ճիշտ չէ ընտրություններից հետո հրապարակել էլեկտրոնային գրանցման սարքերով ֆիքսվող ընտրողների ցուցակները, քանի որ դա խախտում է գաղտնիության սկզբունքը, սակայն նրան հակադարձեց Սերգեյ Բագրատյանը՝ նշելով, որ կա նման պրակտիկա: Այնուհետև նա հայտարարեց, որ ընտրությունները կեղծ են եղել: Դավիթ Հարությունյանն էլ արձագանքեց. «Տենց բաներ մի ասեք: Պարոն Բագրատյան, կլինի՞ ինչքան բացասական բան կա իմ անձի հետ կապված ասեք, որ հետո կարողանանք հանգիստ գնալ առաջ բովանդակային քննարկման: Հիմա, որ ասում եք՝ դուք սենք, դուք նենց, սա ճիշտ տեղը չի: Հասկանում եմ, որ կամերաների առկայությունն է դա ստիպում անել: Ինչ ուզում եք ասեք իմ մասին, ես ընդունում եմ ու չեմ էլ արձագանքելու»: Ի պատասխան Բագրատյանը նշեց, որ նրա անձի հետ կապված ոչ մի խնդիր չկա: «Ես կարծում եմ՝ էստեղ գաղտնիության բացահայտման խնդիր չկա, որովհետեւ Վենետիկի հանձնաժողովի եւ այլ միջազգային կառույցների կողմից կան առաջարկներ, բայց չկա իմպերատիվ պահանջ: Ընդ որում կան բազմաթիվ առաջարկներ, որից պետք չի ընտրել այն, որը ձեզ հարմար է»,- եզրափակեց «Ծառուկյան» խմբակցության պատգամավորը: