Դավիթ Հարությունյանը վերջին օրերի բացահայտումների մասին
Վերջին օրերին ուժային կառույցների կողմից Հանրապետական կուսակցության անդամների ձերբակալությունների ու իրականացված չարաշահումների բացահայտումների դեպքերին Դավիթ Հարությունյանը ցավով է վերաբերվում, սակայն կուսակցության պատասխանատվությունն այստեղ չի տեսնում: Այս մասին հուլիսի 4-ին ԱԺ-ում լրագրողներին հայտնեց Հանրապետական կուսակցության անդամ Դավիթ Հարությունյանը: «Հանցագործություն կատարող անձանց նկատմամբ իմ վերաբերմունքը չի տարբերվում՝ նրանց կուսակցական պատկանելությամբ պայմանավորված: Հանրապետականը եղել է բազմամարդ և իշխանության լծակներ ունեցող կուսակցություն, եթե վիճակագրորեն նայենք, այստեղ բնական է, որ խնդիրներն ավելի շատ կարող են լինեն, քան փոքրաթիվ կուսակցությունում»,-«Արմենպրես»-ի փոխանցմամբ, ասաց Հարությունյանը: Դավիթ Հարությունյանը չի ժխտում, որ նախկին իշխանության օրոք նման աղմկահարույց բացահայտումներ չեն եղել, բայց հավաստիացնում է, որ նման դեպքեր եղել են ու մեղավորները ստացել են իրենց պատիժը: «Նախկինում ևս եղել են բացահայտումներ, որոնք վերաբերել են նաև Հանրապետական կուսակցության անդամներին, ուղղակի դրանց մասին այսքան բարձրաձայն չի խոսվել»,- նշեց ՀՀԿ ներկայացուցիչը: Արդարադատության նախկին նախարարի համար ուժային կառույցների տարածած հաղորդագրություններում որոշ հարցեր մնացել են անպատասխան: Դավիթ Հարությունյանը անհասկանալի է համարում, մասնավորապես, «Հայաստան» համահայկական հիմնադրամի գործադիր տնօրեն Արա Վարդանյանին վերաբերող հայտարարությունը: «Ասվում է, որ իր անձնական գումարները մուտքագրել էր հաշվապահություն` քողարկելու համար վատնումը: Եթե իրականում ամբողջ գումարը վճարել է իր անձնական գրպանից, ես այստեղ չէի տեսնի վատնում, բայց որևէ տեղեկատվություն չունեմ ու հակված չեմ որևէ մեկին արդարացնելու»,- նշեց Հարությունյանը: Պաշտպանության նախկին նախարար Միքայել Հարությունյանին առաջադրված մեղադրանքն էլ Դավիթ Հարությունյանը համարում է շատ լուրջ բացթողում: ՀՀԿ անդամի խոսքով, Միքայել Հարությունյանի նկատմամբ չի կարող կիրառվել ՀՀ քրեական օրենսգրքի 300.1 հոդվածը, որովհետև այն 2008թ.-ի մարտի 1-ին գոյություն չի ունեցել և քրեորեն պատժելի արարքը հետադարձ ուժ չպետք է ունենա: «Սա շատ լուրջ հարված էր թե այլ բացահայտումներին, թե նպատակին: Այս շտապողականությունը, որի արդյունքում խախտվում է Սահմանադրությունը, անթույլատրելի է: Հույս ունեմ, որ այսօր մեր իրավապահ մարմիններն ավելի աչալուրջ կվերաբերվեն իրենց աշխատանքին, որովհետև այսպիսի սխալներով արժեզրկում են մյուս աշխատանքները»,- նշեց Դավիթ Հարությունյանը: Ինչ վերաբերում է վերջին օրերին ուժային կառույցների կողմից ապօրինի հարստացման դեպքերի բացահայտումներին, ապա Հարությունյանի խոսքով` մինչև 2017թ.-ի հուլիսի 1-ը կատարված որևէ անբացատրելի հարստացում քրեականացված չէ:
Հետևեք մեզ Viber-ում
