«Ձերբակալվելուց 3 օր առաջ հանդիպել եմ Մանվել Գրիգորյանի հետ». Արամ Սարգսյան
Այսօր լրագրողների հետ զրույցում «Ելք» խմբակցության պատգամավոր Արամ Սարգսյանն ասել է, որ Մանվել Գրիգորյանին տեսել է նրա ձերբակալումից երեք օրև առաջ: «Ձերբակալվելուց երևի 3 օր առաջ հանդիպել եմ և խոսակցություն է եղել, որ ճիշտ կլինի՝ դու հրաժարվես Երկրապահի նախագահի պաշտոնից՝ հնարավորություն տալով մնացած տղաներին վերադառնալ երկրապահ, իսկ դու մնաս ԵԿՄ վարչության անդամ: Վարչությունն ում կընտրի ԵԿՄ նախագահ, թող նա էլ լինի, դու էլ, որպես ԵԿՄ-ն այսքան տարիների պահած մարդ, ինչով կարող ես, օգնես էդ տղաներին: Նման խոսակցություն, քննարկում եղել է, բայց ուրբաթը շաբաթից շուտ եկավ»,- հայտարարել է նա: Հարցին, թե կուզենա՞ր տեսնել Մանվել Գրիգորյանին, ասել է, որ ոչ. «Չէի ուզենա հանդիպել, որովհետև այս պահին ասելիք չունեմ: Այն, ինչ մտածում եմ, այն, ինչ տեսել եմ՝ կանգնելն ու ասելը հենց հիմա իր երեսին՝ չեմ կարծում, որ էդքան էլ ճիշտ է: Գնալ ու մխիթարել, սուտ բաներ ասել՝ դրա ցանկությունը չունեմ բացարձակ: Ինքն ասել է, որ ինքն ի զորու է, ինքը պատրաստ է իր անմեղությունն ապացուցել, դրանում իր մասնակցությունը բացառել, ես շատ-շատ կուզենայի, կցանկանայի, որ ինքը դա կարողանար...»:
Հետևեք մեզ Viber-ում
