Լոռու մարզում Ալավերդու քաղաքապետարանի հաշվեկշռում գրանցված բեռնատարը կողաշրջվել է. կա վիրավոր. ՖՈՏՈՌԵՊՈՐՏԱԺ

Երեկ՝ հունիսի 24-ին, արտակարգ դեպք է տեղի ունեցել Լոռու մարզում: Ժամը 13:30-ի սահմաններում Ալավերդի քաղաքի «Մադան» թաղամաս բարձրացող ճանապարհի 5-րդ կիլոմետրում Ալավերդու բնակիչ, 32-ամյա Հայկ Քառյանը՝ կորցրել է իր վարած ГАЗ -53 մակնիշի 893 SU 36 համարանիշի մեքենայի կառավարումը և կողաշրջվել: Վթարի հետևանքով ուղևոր՝ Ալավերդիի բնակիչ, 56-ամյա Սամվել Հովհաննիսյանը, մարմնական վնասվածքներով տեղափոխվել է Ալավերդու բժշկական կենտրոն, որտեղ առաջին բուժօգնություն ստանալուց հետո դուրս է գրվել: Դեպքի վայր են ժամանել ոստիկանության Թումանյանի բաժնի ծառայողները՝ ՃՈ 2-րդ սպայական գումարտակի 5-րդ վաշտի աշխատակիցները՝ վաշտի հրամանատար Սմբատ Նարեկյանի գլխավորությամբ: Ժամանել է նույն վաշտի հետաքննիչ Գարիկ Մելիքսեթյանը, ում կողմից փաստի առթիվ նյութեր են նախապատրաստվում: Գ. Շամշյանի տեղեկություններով, ավտոմեքենան հաշվառված է Ալավերդու քաղաքապետարանի կոմունալ-տնտեսության հաշվեկշռում: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Էդիկ Սիմոնյանի