Փաշինյանի այցը Բրյուսել` հագեցած օրակարգով

Վարչապետ Նիկոլ Փաշինյանն առաջիկայում կմեկնի Բրյուսել: Ֆեյսբուքյան իր տեսաուղերձում նա ասել է, որ պատրաստվում է այցելել Եվրամիություն, որտեղ բարձրաստիճան պաշտոնյաների հետ հանդիպումներ կլինեն: Նա ընդգծել է, որ Հայաստանը շատ ակտիվ արտաքին քաղաքականություն պետք է վարի՝ ևս մեկ անգամ վստահեցնելով, որ Հայաստանի արտաքին քաղաքականության մեջ շրջադարձեր չեն լինելու: «Մեր արտաքին քաղաքականությունը կվարվի և կզարգանա՝ ըստ այն տրամաբանության, ինչի մասին ասել եմ՝ որպես վարչապետի թեկնածու ելույթ ունենալիս, ինչի մասին արձանագրված է մեր կառավարության ծրագրում, և ինչի մասին խոսել եմ կառավարության ծրագրի խորհրդատվական քննարկումների ժամանակ»,- շեշտել է Ն.Փաշինյանը: Վարչապետի բրյուսելյան այցի օրակարգը դեռ նախապատրաստական փուլում է, սակայն դատելով ՀՀ վարչապետի և ԵՄ ներկայացուցիչների վերջին երկու ամիսների ուղերձներից՝ ակնհայտ է, որ այս այցից կողմերը որոշ ակնկալիքներ ունեն: Եվրոպական կողմի ակնկալիքները շատ ավելի լուրջ են: Մինչ հայկական կողմն իշխանափոխությունից հետո զուսպ էր իր եվրոպական ուղղությամբ «մտադրությունները» հանրայնացնելու առումով, ԵՄ բարձրաստիճան պաշտոնյաները դրական ազդակներ, ծրագրային ելույթներ և Բրյուսել այց էին սպասում ՀՀ իշխանություններից: «168 Ժամի» բրյուսելյան աղբյուրների համաձայն՝ Փաշինյանին Բրյուսելի ամենաբարձր ղեկավարությունը սպասում էր շատ ավելի վաղուց, սակայն, ինչ-ինչ պատճառներով այդ այցը հնարավոր չեղավ կազմակերպել մայիս ամսին: Ըստ «168 Ժամի» աղբյուրների, Մոգերինի-Փաշինյան հեռախոսազրույցի ընթացքում առաջարկ էր եղել ներկա գտնվել մայիսի 16-ին Եվրոպական խորհրդարանում ԵՄ-ի և Հայաստանի միջև Համապարփակ և ընդլայնված գործընկերության համաձայնագրի վավերացման քվեարկությանը, որից բացի՝ ԵՄ-ն որոշել էր աջակցություն հայտնել ՀՀ նոր իշխանություններին՝ խոստանալով համագործակցության, ֆինանսավորման ընդլայնում որոշ ոլորտներում, փորձելով խրախուսել ՀՀ նոր իշխանությունների պայքարը հանուն բարեփոխումների: Սակայն, ըստ «168 Ժամի» զրուցակցի, այդ արարողությունն անցավ առանց ՀՀ նորընտիր վարչապետի, սակայն առաջիկայում` հուլիսի 4-ին, նախատեսվում է գործընկերության մասին համաձայնագրի (CEPA) ամփոփիչ քվեարկությունը, և այս անգամ, ըստ ամենայնի, հայկական կողմը կունենա ամենաբարձր մակարդակի ներկայացվածություն: «Եվրոպական կողմն ակնկալում է, որ այցը տեղի կունենա այդ օրերին: Բնականաբար, փաստաթուղթը կվավերացվի մեծամասնության կողմից, ինչպես մայիսին: Որևէ մեկը կասկածներ չունի այս առիթով, և դա դրական մթնոլորտ կստեղծի պաշտոնյաների բանակցությունների համար, որոնք նախատեսվում են հիմնականում վիզային ազատականացման և բիզնես կապերի խորացման հարցերի շուրջ: Հիմնական շեշտը կդրվի այս ոլորտների վրա, քանի որ ՀՀ-ԵՄ համաձայնագիրն արդեն անդրադառնում է քաղաքական համագործակցությանը, դրանով ամեն բան ամրագրված է, սակայն կա ակնկալիք, որ կարող են խորանալ բիզնես կապերն ու շփումները, կքննարկվեն Հայաստանին տրվող ֆինանսական աջակցության ընդլայնման հարցերը, ինչպես նաև վիզային ազատականացման բանակցությունների մեկնարկի հարցը: Կան քննարկումներ, որ մեկնարկը տրվի այս այցի ժամանակ, սակայն վերջնական որոշում դեռ չկա: Մանրամասները դեռ քննարկվում են: Միանշանակ է, որ կա ցանկություն՝ ՀՀ վարչապետին դիմավորելու հնարավորինս ներկայանալի և լավ, քանի որ Եվրամիությունը ՀՀ ներկայիս իշխանությունների հետ համագործակցության լայն դաշտ է տեսնում, ակնկալում է, որ Եվրամիության հարաբերությունները Հայաստանի հետ կլինեն այն մակարդակի վրա, ինչ եվրոպական ներդրումներն ու աջակցությունն են ՀՀ-ին, քանի որ տարիներ շարունակ ԵՄ-ն եղել է Հայաստանին ամենամեծ աջակցություն տվող կառույցը, սակայն քաղաքական հարաբերությունների մակարդակը դրան այդքան էլ համապատասխան չի եղել: